Bataaxe katta
Koloosinko
[Kuuɲinden do Allatiigeye]
1
Ke bataaxe wa gilli inke Pawulu yi, Isa Alimasiiwu faare ga ni in ŋa, na a saxu Alla ramuuriyen kanma, a giri in do o waaxi Timoote ya yi. 2 A wa katta ku beenu su ga ni allanbattaana duntenŋun ŋa Isa Alimasiiwu kapanlenmaaxun noxo, i gaa Koloosi yi. O faaba Alla neeman do a xeerin gan na ɲa axa kanma.3 O wa Alla tiigana, o Kaman Isa Alimasiiwu faaba, o wa Alla ɲaagana axa danŋa xa waxati su, 4 baawo axa danqanaaxu be gaa Isa Alimasiiwu kanma, a do xanuye be gaa axa yi katta allanbattaanon su yi, o da a su mugu. 5 Ken danqanaaxu do xanuye ke, i tuuganton na axa jikken gaa ke be yi ya, ken wa taaxiini axa da kanmun ŋa, axa da ken tu ti tonŋun digaamen ya yi, Xibaari Liŋe 6 ma a gaa kiɲeene axa yi, a sanqi, nan yillekare ti xeerin ŋa duna noxon danman su yi. Gelli koota be axa ga da Alla yideyen kita na a tonŋuntaaxun tu, Xibaari Liŋe ke ɲa axa xa maxa ken moxo baananne ya yi. 7 Hepafara ya n da axa xaranŋundi, o kapanlenxana ti golliɲanlenmaaxun ŋa, a wa gollini axa da ti duntenŋaaxun ŋa Alimasiiwu kanma. 8 Ayiwa Fanka Sennen ga da xanuye be ro axa sondomun ŋa, a da ken xa maxankutu o danŋa.
[Pawulu Allanɲaageye Koloosi Isanjaman da]
9 Ken ya saabuda ni gelli a ga koni o da koota be, o ga ma faareti allanɲaageyen ŋa axa da. O wa duwanŋa ; yelli axa gan na a liŋun tu, tuwaaxu fo tinmante yi, ti fontuwaaxu do faamuye be Fanka Sennen gaa a kinni axa yi. 10 Ken ŋa, axa na bire, biremoxo be ga n xawa Kamanen maxa, axa na katu Alla sagon dabarini moxon su kanma ti ɲangolli siren danben su yi, axa na katu Alla tallan tuunu xa. 11 Yelli axa gan na senbekite ti a nooron senben lanɲaran ŋa, kuudo axa n katu tiifini nan muɲi fon su yi, sewoyen kanma. 12 Baaba Alla ke be ga da axa ɲa xeyimaxantanlenmo yi kafini seri sennun ŋa i xeyen noxo, nooron noxon ŋa, xa da a tiiga. 13 A da o boosi Ibiliisa fankan ŋa, na o wara i Renxanan tunkaaxun noxo, 14 o maxawase ti ken renme ya yi, o junuubunun yanpe.
[Alimasiiwu darontaaxu]
15 Ke Alla be ga nta wariini, a sawuran ya ni ke renme yi. Ke renme ni ren sooman ya yi tagefon su kanma.
16 Baawo fo wo fo gaa kanmun do ɲiiɲen ŋa, Alla da a su taga ti a ya yi, ke be gaa wariini, a do ke be ga nta wariini, mareyun do fankanu, a do kandanun do raniyu, a su tage ti a ya yi, a su tage a ya da.
17 A ya n ɲi du yi fon su kaane, fon su sabatinten na ti a ya yi.
18 A ya ni suufun su yinmen ŋa, ken ga ni a yinmotoonu, a ya n joŋa, ren sooma be fina ga wulli gilli furun naxa, kuudo a ya nan ɲa sapon su kaananken ŋa.
19 Baawo Alla da a ramuuru ti allaaxun tinmanten nan ɲi Isa yi ya,
20 genmanlenmaaxun na ɲaŋi ike Alla yinme do tagefon su naxa ti aken Isa yi. Alla da ken xeeri ɲa duna su danŋa kanmun do ɲiiɲen ŋa, ti aken Isa foren ya yi sallibinsollen kanma.
[Pawulu golliyinme]
21 Ayiwa axakun ɲi mukkaaxun do allanxonnaaxun ya yi nan xaso, na a sababun ɲa axa golli burun do axa sinmayi burun ŋa. 22 Xa saasa, Alla faayi ga da axa genmanlenmaaxu ti i renmen kallen ŋa¤, kuudo axa sennun na bange ike Alla jon me naxa, na a ɲi jalagi do kuralle nta axa yi. 23 Xa, xa kende ti danqanaaxun ŋa, xa n sigi, nan sabati, axa ga da jikke ke be kita ti Xibaari Liŋen ŋa, fo wo fo n maxa ken bonondi axa maxa. Waajunden ɲa ti ken Xibaari Liŋe ya yi tagefon su danŋa duna ke noxon ŋa. Inke Pawulu xa ɲa ken Xibaari Liŋi baananne ya da xidimaana yi.
24 Saasa kuŋa, n tooranten ya ni do axa batten ŋa de, xa ken ɲaxaliyen wa in ŋa. Ke be ga toxo in da, ken ni ya, na Alimasiiwu tooran kutten tiŋa, na a tinmandi. N na a tinmandini a faten deemanden ya da, ken ga ni Isa Yinmotoonun ŋa. 25 Nke ɲa kun ya da xidimaana yi, ti siga be Alla ga da a xaliifa in ŋa, kuudo na aken Alla digaamen gangu katta axa yi tinmeye yaaxe maxa. 26 Gannin ŋa, ken gundo muxunten ya n ɲi, a muxunten ya n ɲi waxatin su yi, saasa kuŋa, Alla da a bangandi i seri sennun da. 27 Nafa xoore be gaa ke gundo yi duna seranjamon su da, a da a xanu i na ken ya bangandi sero da, ku beenu ga feti Yehuudiyanu yi. Gundo ke ni : Alimasiiwu wa axa yonkinun ŋa, nooron jigintaaxu. 28 Oku na ken Isa ya xibaaren gangunu, na be su gongo, na be su waaju ti fontuwaaxun ŋa, kuudo na be su tinmandi Alimasiiwu kapanlenmaaxun ŋa. 29 Ken ya n sigi in gaa gollini, nan fanqe ti senbe be ga giri Alimasiiwu yi, ken senbe gaa in kandana ti fankan ŋa.