[Pawulu kuuɲinden do Tesaloniixenkon tuubiye]
1
Nke Pawulu do Siliwaano,¤ kafiini Timoote, o ya faayi gaa ke bataaxe safana katta Tesaloniixe batijama ke be gaa Baaba Alla do kamane Isa Alimasiiwu xallaaxun ɲa. Alla neeman do a xeeri gan na ɲa axa kanma.2 O allanɲaageta su, o nta fatene bakka Alla tiigeyen ŋa o ga ma axa toxonun ko waxatin su yi ti fiinu yi, kun ga ni : 3 axa ga da ɲangollu be dabari axa danqanaaxun noxon ŋa, ken do axa ga da golli xoto be ɲa axa xanuyen saabu da, kafiini axa ga tiifi nan muɲi ti axa ga da axa jikken saxu kamane Isa Alimasiiwu kanma, o kiilun wa ken su yi Baaba Alla jon ŋa. 4 O maaren liŋu, o wa a tu nan ti Alla da axa sugandi, 5 baawo o ga da Xibaari Liŋe ke be kiɲandi axa yi, a ma ɲa sefe duuro yi, Alla Fanka Sennen do senben do danqanaaxu xooren su ya n kapa a yi. O ga ɲi axa noxon ŋa moxo be do axa xeerin batte, axa wa a tu. 6 Axakun xa be ga ni, axa da o seera, na Kamanen seera, baawo axa duŋe Alla sefen ŋa xota xooren ya noxon ŋa, nan sewo ti Fanka Sennen deemanden ŋa. 7 Ken moxo, axa ɲa misaale yi Maxidoona maran do Haaxe maran toŋondinton su da. 8 Tonŋu, Kamanen xibaaren dankati axa kaara ya yi, nan sanqi ma a gaa kiɲene Maxidoona do Haaxe yi. Ken xa baane fe, axa yinmenu danqanaaxuye ti Alla yi, a xibaaren kiɲe noqun su ya yi. Ken saabu da, a ma jare oku gaa fo tana koono. 9 Axa ga da o bisimilla axa kaara yi moxo be, i yinmenu wa a laxamini, ken do axa ga da axa falle koyi munonun ŋa nan teleŋo ke be ga ni Alla ŋalinta haxiixan ŋa, na a batu, 10 na a renme Isa riyen xa dugu gilli kanmun ŋa, a ken be ga wundi bakka furun naxan ŋa, a gaa o kisini bakka Alla butte ke yanganxatan be gaa riini.