[Pawulu golli ɲaŋinto]
2
N maarenmu, axa yinmenu wa a tu nan ti o ma ri axa banŋe xafu. 2 Axa wa a tu nan ti o ga ɲi Filipo deben ŋa, o toore nan kayi. Xa ken do i fi su, Alla da o buttun xotondi, hari a ga na ɲa gajanŋen noxon ya yi, o katu Alla Xibaari Liŋen kiɲandini axa yi. 3 O xirinde ke nta gaare kanma, sobintaaxu kanma fe, nanbarantaaxu kanma fe. 4 Xa Alla yinme ya n da o segesege na Xibaari Liŋen xaliifa o yi, ken ya ni o gaa sefene. O nta a dabari ti o nan liŋo seron da de. Alla ke be gaa o segesekke, o na a dabarini o nan liŋo ken ya da. 5 Ayiwa axa wa a tu nan ti o ma sere su neene ti o sefon ŋa abada, o ma a ɲa ti fo muuriye yi, Alla wa a seeda. 6 O ma daroye muuru sere su yi, axakun fe, sere tana fe. 7 Na a ɲi xa, Alimasiiwu faarun ya ga ni o yi, o ra ɲi o kandan roono axa kanma. Xa bire be o ga ɲi axa noxon ŋa, o ɲa nooxu ya yi xo lendunjaaxen gaa i renmen sorogono moxo be. 8 Xanuyi xoore be gaa o maxa katta axa yi, ken ya n sigi o ga da Alla Xibaari Liŋen kiɲandi axa yi, xa o ma ɲi xenpene ken baane yi de ! O moxosironton ya n ɲi na hari o yonkinun kuyi axa da, na a sababun ɲa o ga da axa tallan xanu moxo be. 9 N maarenmu, axa kiilun wa o gollen do tanpiyen ŋa, na o toxo Alla Xibaari Liŋen kiɲanden ŋa, o ɲi gollini ya wuron do kiye, kuudo o likke n maxa ro axa du baananbe su kanma. 10 Axa yinmenu wa a seeda, Alla xa wa a seeda nan ti o tere katta axakun toŋondinto yi ti senontaaxun do teleŋontaaxun ya yi. Jalagindira su xa ma kite o yi. 11 Axa wa a tu xa nan ti o da axa baane su raga xo faabe gaa i yinme renmun ragana moxo be ya. 12 O da axa waaju, na axa buttun xotondi, na axa ɲonqi kuudo axa n bire xo moxo be ga n xawa katta Alla ke be gaa axa xilli roono i tunkaaxun do i nooron ŋa.13 Ke be ga sigi o gaa Alla tiigana waxati su yi, a faayi : o ga da Alla sefe be kiɲandi axa yi, axa da a mugu, axa da a raga. Axa ma a raga xo haadamarensefe, xa axa da a raga xo Alla sefen ya, ken yinme xa ya ni. Axakun beenu gaa danqanaaxunu, a wa a kanma nan golli axa yi. 14 Ayiwa, n maarenmu, Alla batijama be gaa Isa Alimasiiwu kapanlenmaaxun ŋa, Yehuuda mara, axa da i xeye tooran ŋa. Baawo Yehuudiyanun ga da i tooro moxo be, axa xa jamaanen seron da axa tooro ken moxo baane ya yi. 15 Ikun be ga da kamane Isa kari, i ya n da annabinyinmun xa kari nan xaso, i ya n da o xa tooro. I ɲangollun nta liŋi Alla da, i do seren su ɲa me da xonne. 16 I da a xanu na o kaba xabiilan tanan waajunu i gaa kisiini. Ken moxo ya ni, i ga ɲi yangoburugumaaxu be yi nan xaso, a ga kiɲe i xenpan ŋa, ma Alla butten yanganxatan gaa lagarini i kitta.
[Timoote xayinde]
17 Ayiwa oku ku, n maarenmu, hari o ga senbentanfate bakka axa yi ke wuce yi, ti o suufun ŋa, o sondomun kun wa axa kanma, o da o duuruxotoyen su dabari kuudo nan ri bogu axa yi, baawo axa xiiden da o raga. 18 O da a xanu nan daga bogu axa yi, nke Pawulu ken yinme da a saata ta gabe, xa Ibiliisa da o fata telle. 19 Keti, o kaman Isa riikoota, axa ya feti o jikken ŋa ? Axa ya feti o sewoyen ŋa ba ? Ma axa ya feti o yinmarawutitooren ŋa ? 20 Tonŋu, axa ya n ni o daroyen do o sewoyen ŋa !