[Timoote xayiye Tesaloniixe yi]
3
Ayiwa, o ra ntaxa dugundini, o kande o baane n toxo Hateena deben ŋa, 2 na o waaxi Timoote wara katta axa yi. O do a wa golliɲanlenmaaxun ŋa Alla da Isa Alimasiiwu Xibaari Liŋen gangunden noxon ŋa. A na senben do duuruxotoyen kini axa yi axa liimaanagankaaxun danŋa, 3 kuudo toora ke be gaa axa kanma saasa, sere su nan maxa jikkirankuti, baawo axa yinme wa a tu nan ti Alla da o xiri ti ken ya yi. 4 O ga ɲi axa noqu bire be, o da a ko axa da lenki kaane nan ti xotan wa riini. Axa wa a tu nan ti ken ya faayi ga ri. 5 Ken ya saabu da, n ra gaa ntaxa dugundini, n da Timoote xayi dagana axa danqanaaxun fi tu, baawo in wa kanna Ibiliisa¤ nan maxa axa gaata, o tanpiyen gaa ɲaana xafu.6 Ayiwa saasa ke, Timoote saage riini nan giri axa banŋe, danqanaaxu be do xanuye be gaa axa yi, a da xibaari sire kiɲandi o yi. A da a ko nan ti axa kiilun wa o kanma siri. A da a ko xa nan ti axa wa mulla na o wari xadi, o xa na a mulla na axa wari ken moxo baane ya. 7 Ken saabu da in maarenmu, o gaa toora do xota su noxo, axa danqanaaxun da o haqilun taaxundi. 8 Saasa ke, o fillanbire, baawo axa sabatinton ya ni Kamanen killen kanma. 9 Ke ɲaxaliyi xoore be gaa o yi Alla jon ŋa ti axa xibaaren ŋa, kan maamande na o maxa katta Alla yi ti ken ŋa ? 10 O wa Alla ɲaagana wuron do kiye, ɲaageye su xenpa, kuudo o do axa na yille me walla, axa danqanaaxun ga konto ti ke be yi, o na a tinmandi.
11 O faaba Alla yinme do o kaman Isa gan na killen kini o yi katta axa banŋe. 12 Kamanen gan na xanuyen jiidi axa do me naxa, ma a ga guuji axa do duna seren su naxa, xo xanuye be gaa o maxa katta axa yi. 13 Ken moxo, Alla na axa sondomun xalasi, kuudo axa na seno, jalagindira su ga nta kiteene axa yi Baaba Alla jon ŋa o kaman Isa do i seri sugandinton riikootan ŋa.