[Biremoxo sire Alla da]
4
Ken kutten ŋa keeta, n maarenmu, o gaa ke be muurunu axa yi, a do o gaa axa ɲonqini katta ke be yi ti Kamane Isa toxon ŋa, a faayi : axa ga n xawa du ragana moxo be kuudo nan liŋo Alla da, axa da ken xara o maxa, axa da du raga kundun xa ya yi. Harisa, xa da fo kafu a yi. 2 O ga da toŋondu be kita Kamane Isa yi na i kini axa yi, axa wa kun tu. 3 Alla sagon ni axa senontaaxun ya yi : axa nan laato bakka jeeniyen ŋa. 4 Axa du baananbe su nan katu i du goyimene, kuudo axa na bire senontaaxun do daroyen noxon ŋa. 5 Axa n maxa axa du toxo yonkiliŋu buren maxa xo ku be ga feti Yehuudiyanu, i ga nta Alla tu. 6 Ken moxo, sere su ntaxa roono i waaxin da gace an gaa a haqun sooxini ti kun fiinu yi, baawo Kamanen ya na ku do i me su kiiten kuttu. O da ken ko axa da nan xaso, o da axa gongo xa. 7 Baawo Alla ma o xiri o nan bire sobintaaxu noxon ŋa, a da o xiri o nan bire senontaaxun ya noxon ŋa. 8 Ken saabu da, sere be ga na ku xaranŋundu sedi, a ma haadamarenme sedi de, a da Alla ya sedi, aken be gaa i Fanka Sennen kinni axa yi.9 Fi be gaa taŋene xanuye be gaa axa do me naxan ŋa, a ma jare i nan safandi katta axa yi ken kanma, baawo na me xanu, axa da ken xara Alla ya maxa. 10 Axa na ken yinme ya dabarini katta waaxin su yi Maxidoona su yi. Xa in maarenmu, o gaa axa ɲonqini katta ke be yi, ken ni axa nan tallan daga kaane ya. 11 Ayiwa xa duuruxoto axa nan tenku, nan xata axa yinmenu xibaaren ŋa, nan kittirangolli xo o ga da a xaranŋundi axa yi moxo be nan xaso, 12 kuudo sellan seron na axa daro, axa likke xa nta ɲaana sere su kanma.
[Kamane Isa riye]
13 N maarenmu, fi be gaa taŋene ku be ga kara, o nta a mulla na i xibaaren toxo axa da sankon ŋa, kuudo axa nan maxa suno xo jikke ga nta seri kuttu ku be maxa. 14 O ga saxu a yi nan ti Isa faati nan wundi, ken ya saabu da o ga saxu a yi nan ti toŋondinto ku be ga kara, Alla na i wundunu ti Isa ya yi, i do a gaa ɲaana doome. 15 O gaa fi be koono axa da, a faayi, Kamanen yinme ya sefe ni : Kamanen riikootan gaa oku be ɲiini birene, o nta warene furu ku kaane lewu. 16 Ken koota, gangundixannen na mugi, a do maliikannun yinmanken xannen do allanbuutun timixanne. Ken bire, Kamane Isa yinme na yanqa gilli kanmun ŋa. Ku be ga kara i tokkinton gaa Sugandiyenmen ŋa, kun fina ya n gilli. 17 Ken falle, oku be gaa birene, o do i su na wuti katta tabullun ŋa, o do Kamanen na gemu kanmun ŋa. Ken moxo yi, o do a na toxo doome ma abada. 18 Ken kuŋa, xa da me kiilunun taaxundi ti ku sefo yi.