5
N maarenmu, fi be gaa taŋene ku fi koninto biren do i waxatin ŋa, a ma jare o gaa safandini katta axa yi ti kun ŋa. 2 Baawo axa yinmenu wa a tu moxo siri nan ti Kamanen riikootan ɲaana xo fayaanan* wurunman ya yi. 3 Seron gaa tini bire be : « O da xeeri kita, o ro tangeyen ŋa* », bonen faayi gaa juyintanxenne i kanma ken bire ya yi xo karandun gaa juyintanxenne nuxunten ŋa moxo be. Ayiwa i nta kisiini moxo su. 4 Xa in maarenmu, axakun nta bite yi, ke koota ra gaa axa juunu xo fayaana. 5 Baawo axakun su ni xurayen renmun ya, kiyen renmu ya ni axa yi. Wuro fo feti oku do axakun su yi, sakkati bite. 6 Ken kuŋa, o n maxa xenqe xo kuttun gaa xenqene moxo be. Xa o na du koroosi, na o kiilun toxo o yinmenu yi. 7 Ku be gaa xenqene, i xenqene wuron ya yi. Ku be gaa mandene, i mandene wuron ya yi. 8 Xa oku be ga ni kiyen renmun ŋa, o na o kiilun toxo o yinme yi. O na liimaanagankaaxun do xanuyen ɲa du da gijintangaado, na kisiyen jikken kufunen ro o yinmun ŋa. 9 Baawo Alla ma o taga ti i na o yanganxata ti i butten tooxen ŋa, a da o taga ti i na o kisi ti o kaman Isa Alimasiiwu horoman ya yi. 10 A kara o danŋa ya, kuudo o kara wo, o bire wo, o do a na bire doome. 11 Ken kuŋa, xa da duuruxotoye kini me yi, axa na me senbendi xoyi axa gaa a kanma moxo ke be yi.12 Ayiwa in maarenmu, ku be gaa du tanpindini axa da, na axa xaranŋundi, na axa geesu Kamanen killen kanma, xa da i daro de. 13 Xa da i daro moxo siri, axa na i xanu i golle ke saabu da. Xa da xeerin ɲa me da.
14 N maarenmu, o wa a muurunu axa maxa nan ti : ku be ga ni lenburun ŋa, axa na i gongo. Ku be ga jikkirankuti, axa na i buttun xotondi. Ku be ga ni senberanloxon ŋa, axa na i deema. Axa nan muɲi seren su da. 15 Xa da du koroosi, sere su n maxa tanbu bure tuga ti tanbu bure yi. Xa, axa sukke do fiisiriɲanŋen ya yi me da, a do seren kutten su da.
16 Xa sewo waxatin su. 17 Xa sukke do allanɲaageyen ŋa. 18 Xa da Alla tiiga fin su yi, baawo Alla liŋun na ken ya yi axa da Isa Alimasiiwu kapanlenmaaxun ŋa.
19 Xa maxa Fanka Sennen yinbun kari. 20 Xa maxa allanxibaarinden roxo. 21 Xa, xa da fin su guuga, ke be siren ga ni, axa na tigiti ken ŋa. 22 Xa nan laato bakka fi buren noone su yi.
23 Xeerin kama Alla yinme gan na axa senondi lewu. A gan na axa suufun danman su tanga : axa haqilu, axa yonkinu, a do axa fato, kuudo o kaman Isa Alimasiiwu ga na bange koota be, jalagindira su ga n nta kiteene axa yi. 24 Aken Alla be ga da axa xiri, duntenŋen ya ni, a ya na ken su tinmandini.
25 N maarenmu, xa da Alla ɲaaga o xa da. 26 Xa da maarenmun su kuuɲi ti meexandunsunbunden ŋa. 27 N da a muuru axa maxa ti Kamanen toxon ŋa, nan ti ke bataaxe nan xare waaxin su da.
28 O kaman Isa Alimasiiwu neeman gan na ɲa do axa batten ŋa.