[Kuuɲinden do maamande]
1
Nke Pawulu do Siliwaano,¤ kafiini Timoote, o ya faayi gaa ke bataaxe safana katta Tesaloniixe batijama ke be gaa Baaba Alla do kamane Isa Alimasiiwu xallaaxun ŋa. 2 O faaba Alla do kamane Isa Alimasiiwu neeman do i xeerin gan na ɲa axa kanma.3 N maarenmu, bire su oku nan xawa Alla tiigana ti axa xibaaren ŋa ya, ken nan xawa ya xa, baawo axa danqanaaxun wa a kanma nan tallan xooro, xanuye be xa gaa baane su maxa katta baanen ŋa, ken xa wa tallan jiidini. 4 Ken saabu da, oku yinmarawutunton wa axa fin koono Alla batijamon ŋa ti axa sabatiyen do axa danqanaaxun ŋa, hari tooran su do xoteyen su noxon ŋa axa ga muɲi.
5 Ke na Alla kiitimoxo teleŋonten ya koyini. A maanan ni axa do Allantunkaaxu ke nan xawa ya, axa ga toore do ke be batten ŋa. 6 Baawo Alla teleŋonten ya ga ni : ku be gaa axa toorono, a na i tugana ti tooran ya yi, 7 xa axakun beenu ga toore, axa wa riini tuuma kafiini o yi o kaman Isa do i maliikan senbenton ga na bange kanmun ŋa bire be 8 yinbinkuman noxon ŋa. Ayiwa ku be ga nta Alla tu, i ga nta o kaman Isa Xibaari Liŋen batta, a na i yanganxata. 9 I tugaaden wa ɲaana halakiyen do abadanbonen ŋa laatono bakka Kamanen do i senbe daren ŋa. 10 Ku fiinu ɲaana bire be Kamanen ga na ri ya, kuudo nan dare i seri sugandinton noxon ŋa, nan kaawafintanfaayi i danqanaaxuntayenmun su noxon ŋa ken koota. Axa xa wa ken noxon ŋa, baawo axa saxu o seedannaaxun ŋa.
11 Ken ya saabu da, o gaa allanɲaagene axa da waxatin su yi, kuudo Alla na axa jaate ti xirinde ke yi, a do axa gaa a mulla na fi sire su dabari, axa na katu a yi, ken do axa danqanaaxun ga da axa wara gollu be yi, a na i tinmandi ti i senben ŋa. 12 Ken moxo, o kaman Isa toxon na darontaaxu kita ti axa yi, axa xa na darontaaxu kita ti a toxon ŋa ti o Alla do o kaman Isa Alimasiiwu neeman ŋa.