[Allanxonnen riye]
2
N maarenmu, fi be gaa taŋene o kaman Isa Alimasiiwu riyen ŋa, a do o kafumeye a kaaron ŋa, o na fo baane ya muurunu axa maxa, ken ga ni : 2 xa maxa battaran sanku nan hawuje bakka axa killi siren ŋa ti du-allanxibaarinde, ma duuxayinde, ma duubataaxe ti a wa gilli oku yi, nan ti Kamanen riikootan kiɲe dubaane. 3 Sere n maxa katu axa sankundini moxo su yi, baawo saado Kamanen riikoota, seron wa kaafiraaxunu. Ke be ga ni « Allanxonne », a ga tage halakiyen xanne maxa, ma ken xa nan ri du koyi seron ŋa ya. 4 Xonnen ya ni, a wa gilli sigi na du wutu kamannun do batifoonun su kanma. A na hari ro Allanbatikaxooren ŋa nan taaxu nan ti ike yinme ya ni Alla yi.5 Axa kiilun nta a yi, n ga ɲi axa kaara, n ga da kun fiinu ko axa danŋa ba ? 6 Saasa, ke be gaa a kabana du koyini ma a yinme waxatin ga na tinme, axa wa a tu. 7 Baawo Allanxonne ke senbe muxunten do i gollun wa me yi. Ke be gaa a kabana du koyini, ken ya nan xawa sankunu fina. 8 Ken bire, Allanxonne ke na du koyi, Kamane Isa gaa ke be karini ti i raxanfankon* ŋa. Kamanen riyen senben na a buruxa pewu. 9 Allanxonne ke ga na ri Ibiliisa senben noxon ŋa bire be, a do fanka ke danben do taagumanse ke danben su wa bangeene, kafiini kaawafi gaarante ke danben su. 10 A wa halakinton sankundini ti golli bure ke danben su yi. I sanku ya baawo i ga n xawa kisiini ti tonŋu ke be yi, i ma a xanu, i bara a yi ya. 11 Ken saabu da, Alla da sankuntansenbe wara katta i ya, kuudo na i saxundi gaaren ŋa, 12 kuudo, ku be su ga ma saxu tonŋun ŋa, i ga da teleŋontanbalaaxun ya sugandi, Alla yanganxatan na i su raga.
[Danqanaaxun xotonde]
13 Xa in maarenmu, Kamanen gaa axakun be mulla, oku n xawa Alla maamana axa danŋa waxatin su ya yi, na a tuguti Alla da axa sugandi gelli joŋaarun ŋa ya kuudo na axa kisi. Axa kisi xa, baawo axa ga saxu tonŋun ŋa, Alla Fanka Sennen da axa yonkinun senondi. 14 Alla da axa xiri katta ken kisiye yi ti o Xibaari Liŋen waajunden ŋa ya, kuudo axa na taqe kita o kaman Isa Alimasiiwu nooron ŋa. 15 Ken kuŋa in maarenmu, axa nan toxo sabatinto. O ga da laada be xaranŋundi axa yi ti sefe koninte ma ti bataaxi safante, xa tigiti ken ŋa.