[Allanɲaageye Pawulu da]
3
Ken kutten ŋa keeta in maarenmu, xa da Alla ɲaaga o da, kuudo Kamanen digaamen na wuru do noqun su yi, nan dare, xo a ga wuru nan dare axa maxa moxo be. 2 Xa da Alla ɲaaga, o na tange seri bononton ŋa, i buru ga ni, baawo a su ma saxu Xibaari Liŋen ŋa. 3 Xa Kamanen ni duntenŋen ya. A ya na senben kinni axa yi, na axa tanga Ibiliisa yi. 4 O saxunten wa a yi ti Kamanen ŋa, nan ti o ga da axa ɲaamari fiinu ku be yi, axa wa i batta, axa wa toqo i batta xa. 5 Kamane Isa gan na i yinme muɲiyen do Alla xanuyen ro axa sondomun ŋa.[Gollen nafa]
6 Ayiwa in maarenmu, o wa axa ɲaamarini ti o kaman Isa Alimasiiwu toxon ŋa nan ti : waaxi su ga ni lenburen ya yi, a ga nta sukkene do o ga da axa xaranŋundi ku be yi, axa nan laato bakka ken waaxi yi. 7 Axa ga n xawa o seerana moxo be, axa yinmenu wa ken tu, baawo o ga ɲi axa kaara, o ma bire xo lenburu. 8 O ma logon baane yiga sere da xafu. Xa o bire tooran do tanpiyen noxon ya yi nan golli wuron do kiye, kuudo o n maxa ɲa axa dubaananbe su da likke yi. 9 Tonŋun ga ni ke be, a feti xo a kanda ga nta o maxa de, xa o da ke moxo xanu ya kuudo o na ɲa misaalu yi axa da, axa gaa yaaxene do a yi. 10 O ga ɲi axa kaara, o da axa gongo nan ti : Sere be ga nta golle mulla, a n maxa yige ! 11 Na a ɲi o da a mugu nan ti yogonu wa kapa axa yi, lenburun ya ni, i nta fo wo fo yi, i na do wandi fiinun ya yi. 12 Ku sero kundu, o wa i ɲaamarini na a xotondi i maxa ti Kamane Isa Alimasiiwu toxon ŋa nan ti : i nan golli deejeyen noxon ŋa nan bire ti i kittirangollen ŋa.
13 Xa in maarenmu, axakun nan maxa lanpu fiisiriɲanŋen ŋa. 14 Sere wo sere ga ma o ke bataaxe ku sefexannu batu, xa da ken koroosi, axa do a nan maxa ro fi su yi, kuudo a na yaagu ti ken ŋa. 15 Xa ken do i fi su, xa maxa a raga xo xonne, aayi, xa da a gongo ya xo waaxi.
[Kuuɲinden do duwanŋe]
16 Xeerin Kaman yinme gan na xeeri kini axa yi kootan su do moxon su yi. Kamanen gan na ɲa do axa su yi. 17 Ke kuuɲinde ni inke Pawulu yinme safandikitten ya. N da ke taagumansi baane ya ro in bataaxi safanten su yi. N yinme safandikitten ya ni. 18 O kaman Isa Alimasiiwu neeman gan na ɲa do axa su batten ŋa.