[Kuuɲinde]
1
Ke bataaxe giri inke Pawulu ya yi.
O kisindaana Alla,
a do o jikken ga Isa Alimasiiwu ke be yi,
i ya n da ɲaamariyen kini in ŋa in nan ɲa Isa Alimasiiwu faare yi.
2 A wa katta anken Timoote yi,
n leminan haxiixa diinan noxon ŋa.
Baaba Alla do o Kama Isa Alimasiiwu gan na i neeman do i siroyen do i horoman koyi axa yi.
[Dukoroosinde xaranŋundi burun ŋa]
3 Ayiwa,
an nan toxo Yefeesi deben ŋa,
xoyi in dagante Maxidoona maran ŋa,
n ga da a xotondi an maxa moxo be.
Kuudo sero yogonu be gaa non ŋa,
i gaa seron xaranŋundini killi burun ŋa,
an na i kaba.
4 I nan maxa xiisa xafunun do kisimanu ku buruju laatun terinka,
kun riini ti kutanden baane ya yi,
i ra nta Alla gollen denne kaane moxo su yi,
liimaanagankaaxun ya n katta a denne kaane.
5 Ke ɲaamarinde ken xa na xanuyen ya muurunu,
xanuye ke be gaa gilli sondon laabanten do ŋanniyi siren do liimaanagankaaxu xalasinten ŋa.
6 Yogonu da ke kille futu,
nan teleŋo me kutandinxoraaxu be nafa ga nta a yi.
7 I wa a mulla nan ɲa xaranmoxo xooro yi sariyan ŋa,
xa i gaa ke be koono,
i nta a tu,
i gaa sefene ke be kanma xo i wa a tu,
i ma a faamu.
8 O wa a tu nan ti sariyan siren ya ni,
selli o ga na golli xo sariyan golli moxo.
9 O na a tu nan ti sariyan ma ri ti seri teleŋonton ŋa,
a ri ti allankutaanon do murutinton ya yi,
a do allanxonnon do junuubuɲaŋaano,
kafiini laxosonto,
ken do yeburendaano,
ken do ku be gaa i maanu karini na i faabanu kari,
na seren tanan kari.
10 A ri ti jeenaananburun do luutigankon ya yi,
ken do komon julanu,
kafiini gaaranton do battarankunaano,
ken do fo wo fo do xaranŋundi sahanten gaa me sooxini.
11 Ken xaranŋunde ken xa do Alla Xibaari Liŋen su ya na me wuttu,
Alla ke be ga ni nooron kaman ŋa,
a ken tiigetunke ya n da Xibaari Liŋen xaliifa in ŋa.
12 N wa o Kama Isa Alimasiiwu tiigana a ga da senben kini in ŋa.
N wa a tiigana,
a ga da i saxiiraaxun ro in kanma,
na in wara i gollen dabarinden ŋa.
13 Nke ken xa ya n ɲi a toxon bonondini nan xaso,
na a seron tooro* na a ka.
Xa ken do i fi su,
Alla hinne in ŋa,
na a sababun ɲa in ga ɲi ke be dabarini,
n ga nta a tu,
baawo danqanaaxu ma ɲi in ŋa.
14 O Kaman da i neeman guuji in kanma,
ken saabu da,
n da liimaanagankaaxun do xanuyen kita Isa Alimasiiwu kapanlenmaaxun noxon ŋa.
15 Saxiiron digaamen faayi,
seren su ga n xawa duŋene ti a yi :
Isa Alimasiiwu ri duna na junuubuɲaŋaanon ya kisi*.
I su fo buren ni inke ya yi,
16 xa Alla hinne in ŋa.
Ayiwa an ga da a wari Alla ga hinne in ŋa,
inke be ga ni junuubuɲaŋaanon su fo buren ŋa,
ken ni ya Isa Alimasiiwu ga da i muɲintaaxun su koyi in ŋa.
A da ken ɲa ya,
kuudo sero beenu gaa riini saxu a yi,
n na ɲa i da misaale yi,
i na bireyi duumanten kitana.
17 Darontaaxun do nooron wa Tunka duumanten da ma abada,
fillande ga nta ke be yi,
a ga nta kalla,
a ga nta wariini.
Anmiina.
18 Timoote,
n renme,
n da ku xaranŋundu ya xaliifa an ŋa,
nan gemu annabinyinsefo be ga koni an fin kanma nan xaso,
kuudo xaranŋundu ku na ɲa an danŋa senbe an liimaanagankaaxun faasanden danŋa.
19 Tigiti danqanaaxun do ŋanniyi siren ŋa.
Yogonu ŋanniyi siren duguta i ya,
ken ɲa sababu yi,
i saxiiraaxun bono.
20 Himeene* do Lekandooro* wa ken noxon ŋa.
N da i ro Ibiliisa kitten ŋa,
kuudo i na a tu nan ti i ma xawa Alla xajafini.