[Kuuɲinden do buttuxotonde]
1
Ke bataaxe wa gilli inke Pawulu yi,
a liŋo Alla da na in ɲa Isa Alimasiiwu faare yi.
Alla da in ɲaamari nan ti bireye ke be laayidun ga wuti ti Isa Alimasiiwu yi,
n na a gangu.
2 A wa katta anken Timoote yi,
n renxana.
Baaba Alla do o Kama Isa Alimasiiwu gan na i neeman do i siroyen do i horoman koyi axa yi.
3 N wa Alla tiigana,
n haqilen taaxunten gaa gollini Alla ke be da xoyi in seri fanon moxo.
N ga na ɲi Alla batta wuron do kiye,
n wa a ɲaagana an xa da.
4 O ga fate bakka me yi koota be*,
an ga wu moxo be,
n ma mungu do ken ŋa.
Na in toxo sinmene do an wukoota,
a wa liŋoono in da in nan ri bogu an ŋa,
n na ɲaxali moxo siri.
5 N ma mungu do danqanaaxu xalasinte be gaa an ŋa.
An maama Loyise do an ma Henikke fina ya n danqanaaxu,
n saxunten wa a yi nan ti ken danqanaaxu baane ya na an xa maxa.
6 Ken ya saabu da,
n gaa an haqilen yanqandini nan ti :
n ga da in kittun saxu an yinmen ŋa,
an ga da kuye ke be kita Alla yi,
an na a ŋalindi moxo siri.
7 Baawo Alla ga da Fanka Senne ke be ro o yi,
xaaxantaaxu fe.
Senben do xanuyen du ya ni,
a do haqiligumaaxu.
8 Ken kuŋa,
maxa yaagu seedene ti o Kaman ŋa.
Maxa yaagu ti inke be gaa kason ŋa ti a sababun ŋa.
An jikken ro Alla senben ŋa,
an nan kafi in ŋa tooran ŋa do Xibaari Liŋen batte.
9 Alla da o kisi,
na o xiri katta bireyi sennen ŋa.
O gollun ma sigi a ga da ken dabari de,
xa a da a dabari ti i neeman do i rakuton ya yi.
Neema ya ni a ga da a ɲa o da ti Isa Alimasiiwu yi saado duna gaa sikki.
10 Saasa,
ken neema bange do o kisindaana Isa Alimasiiwu riyen ya yi.
Aken ya n da kallen senben ɲama,
na bireyi duumanten bangandi o da ti Xibaari Liŋen ŋa.
11 Alla da in sugandi,
n nan ɲa gangundaana do faare do xaranŋundindaana.
12 Ken ya saabu da,
n gaa ke toora noxon ŋa,
xa a yaagun nta in ŋa.
Baawo,
n ga da in danqanaaxun ro ke be kanma,
n wa a tu.
N saxunten xa wa a yi nan ti in ga da ke be xaliifa a yi,
a ra wa a tangana ma kiiten koota.
13 Ayiwa,
n ga da an xaranŋundi digan sahanto ku be yi,
mali i ya ti danqanaaxu ke do xanuye ke be Isa Alimasiiwu ga da a kini o yi.
14 Fo sire ke be ga xaliife an ŋa,
tigiti a yi ti Fanka Senne ke be gaa o yi.
15 An wa a tu nan ti fo wo fo gaa bakka Haasi maran ŋa,
a su da in wara.
Fijeele do Herimojeene wa ken ŋa.
16 Kamanen gan na i siroyen koyi Wonsifoore kan ŋa,
baawo a wa duruxotoyen kinni in ŋa bire su.
A ma yaagu ti in ŋa ti baawo in wa kason ŋa.
17 Gelli a nan ri Roomu yi,
a du da in muuru ya ma a gaa in walla.
18 Kamane Isa gan na Alla siroyen koyi a yi kiiten koota !
Yabo ke,
a ga da fo wo fo ɲa in da Yefeesi deben ŋa,
an yinme wa a su xala moxo siri.