[Pawulu tonŋondisefo]
2
Ken kuŋa in renme Timoote,
o ga da neema ke be kita ti Isa Alimasiiwu kapanlenmaaxun ŋa,
du senbendi ti ken neema yi.
2 An ga da in mugu ke be xaranŋundini seedaana gabe jon ŋa,
a xaliifa seri sahaabanto ya yi,
kun ra gaa a xaranŋundini sero tana yi.
3 An xa na i kapanlenmaaxu tooran noxon ŋa xo Isa Alimasiiwu kurallen sire.
4 Kurallen siginte su nan xawa dunadunkanxibaaren su walla,
kuudo ke be ga da i ro kuren ŋa,
i na a liŋun dabarini.
5 Wuraana su ra nta wuruyen jalan wuttu,
a ga ma wuru xoyi wuruyen sariyan ga da a ko moxo be.
6 Soxaana be ga soxo siri,
a fina ya n wutundini bakka ten yitti renmun ŋa.
7 N gaa ku be koono an da,
i toxo an haqilen ŋa,
Kamanen na a su faamundi an ŋa.
8 Sinme do Isa Alimasiiwu yi :
Tunka Daawuda bonsonŋen ya ni,
a wundi bakka furun naxa,
xoyi in ga da a ko Xibaari Liŋen waajunden noxon ŋa moxo be.
9 N toore do ken Xibaari Liŋen ya yi.
I da hari in yetu xo golliburiɲaŋaana,
xa Alla sefen ken ma yeti.
10 Ke ya ni,
n gaa a su muɲini,
kuudo kisiye ke be ga giri Isa Alimasiiwu yi,
Alla ga da ku be sugandi,
i xa na a kita kafiini abadan nooron ŋa.
11 Saxiiron digaamen faayi :
Selli o do Alimasiiwu ga kara doome su,
o do a wa riini bire doome.
12 Selli o gaa muɲini,
o do a su na ɲa maraano yi.
Selli o nda a nakkari,
a xa na o nakkarini ya*.
13 Selli o ga ma duntenŋaaxu ti a yi,
aken toqo duntenŋe ya yi.
Baawo,
a ra nta du nakkarini.
[Alla golliɲaŋaana sire]
14 Timoote,
n ga da sefo ku be ko an da,
seron haqilen yanqandi i ya.
I ɲaamari Alla jon ŋa nan ti i n maxa gaja do sefe nafanloxon ŋa.
Nafa su nta ken ŋa,
a ga feti na terinkaanon bonondi.
15 Duruxoto an nan sigi Alla jon me naxa xo golliɲaŋaana sire be ga nta yaagunu ti i gollen ŋa,
nan waajundi ti Alla digan tonŋunten ŋa ti teleŋontaaxu yi.
16 Battaransefo ku be do danqanaaxun ga nta me wuttu,
laato i ya,
baawo a na fo ya tallan kappa allankannanbalaaxun ŋa.
17 I sefon na xo tugu ɲanŋen ya yi,
a gaa tallan xoorono.
Himeene* do Filette kafiini kun sero ya yi.
18 I laato bakka tonŋun ŋa.
I ti wundiyen ɲa nan duguta,
ke moxo ya ni,
i gaa yogonu danqanaaxun bonondini.
19 Xa Alla ga da i kan taaxu gidu be kanma,
a tontaadun xoton ya ni harisa.
Sefo be safanton gaa i kanma,
i faayi :
« Sero be gaa Kamanen da,
a wa i tu.*
»
A ti xadi :
« Sere be ga na ti :
“ Nke na Kamanen ya da, ” a kaman nan xawa laatono bakka golli bure su ya yi. »
20 Kanyokku do xaalisixullunyokku baane nta ɲiini fankamankan noxon ŋa,
nooron do ginon xa wa ɲiini non ŋa.
I yogonu bakka sallinkooton ya yi,
i yogonu na sellan ya yi abada.
21 Ayiwa,
sere wo sere gaa du senondini nan laato bakka ku fi koninto yi,
ken kaman na xo kanyokke be gaa bakka sallinkooton ya yi.
A kaman na xerexere kamanen da.
A na fo siro kamanen ŋa,
a moxosironten ya ni fo siri ɲanŋen su da.
22 Wuru bakka leminaaxun daxanmen ŋa.
Ku be gaa Alla batta ti sondon laabanten ŋa,
kafi kun ŋa,
an na teleŋontaaxun do danqanaaxun do laxafiyan do xanuyen muuru do i batten ŋa.
23 An tan bogu kutandi xafunu be maana ga nta i ya,
an wa a tu nan ti gajankutisefon ya ni.
24 Kamanen xidimaanan ken xa ma xawa gajanŋa,
a nan xawa ɲaana sere ya yi,
nooxaaxun gaa a maxa katta seren su yi,
a ra gaa a su xaranŋundini na tooran muɲi.
25 A n xawa ɲaana nooxe ya yi na i kutandaanon faamundi.
A me wa du,
Alla na i kanda katta tuubiyen ŋa,
i na katu tonŋun tuunu.
26 Ken ŋa,
i na katu i yinme kitana nan bogu Ibiliisa komonkacen ŋa,
a ga da i raga na i ɲaŋi i sagon ŋa.