[Kiyi lagaru]
3
Timoote,
a tu ya mene nan ti :
waxatinu wa kiyi lagarun ŋa,
i xoton ga ni.
2 Na a tugu ti seren su na i yinme baane ya mulla.
I wa ɲaana naaburunxannaano yi,
du konŋaano,
dundaru,
i wa Alla diganburunu.
I wa ɲaana saara kutaano yi,
fisirinwallu,
laxosonto.
3 I wa ɲaana sondon kaawanton ŋa,
i nta hinnene.
I wa seron botoburunu,
sabaru nta i ya.
I wa buroono katta seron ŋa,
na xeerin xoni.
4 I wa ɲaana janbanto yi,
sinmanbalinu.
Dundaraaxun na i finkindi.
I nta Alla mulla,
i na i yonkin liŋun ya mulla.
5 I wa du ɲaana xoyi muumininu,
xa tonŋu,
i da batiyen senben bogu a yi.
An falle koyi kun sero yi.
6 Sero wa kappa i ya,
kun roono do kaanun ya yi,
kuudo yaxaru be ga ma goto,
leminaaxun ga i ya,
i na kun ro i jalon noxon ŋa.
Na a ɲi kun yaxaru xannun fakkon ya ni junuubu,
jaarabiye ke danben su wa do i batten ŋa.
7 Kun yaxaru do tuwaaxu muuriyen wa me yi koota su,
xa i ma katu tonŋun tuunu harisa.
8 Yaneesi do Yanbereesi¤ ga bara duŋene annabi Muusa da moxo be yi de,
ku sero xa bara duŋene tonŋun ŋa kundun ya yi.
I haqilun yillanton ya ni,
i danqanaaxun wa xo xafu.
9 Xa,
i fiinun nta laatono,
baawo a su wa riini i haqilanloxaaxun tu,
xo Yaneesi do Yanbereesi haqilanloxaaxun ga tuyi moxo be.
[Ɲaamarindixan lagaru]
10 Xa anken Timoote,
an sukke do in ŋa,
na in seera fo wo fo yi :
n xaranŋundu,
n biremoxo,
n ramuuriye,
n danqanaaxu,
n muɲiye,
xanuye be gaa in maxa,
n sabariye,
an da a su seera.
11 Kan toora do tanpiyi xoten toxo n ga ma ke be wari ?
A su ɲa Hansooxi-pisiidi debe,*
a do Yikooni* do Lisitiira* ya yi,
an tuwaaxun a yi.
Xoyi n ma tanpi ya ba ?
Xa ken do i fi su,
Kamanen da in kisi ken su yi.
12 Tonŋu,
sere su gaa a mulla nan bire muuminaaxun ya yi tokkini Isa Alimasiiwu yi,
an toorene ya.
13 Ganta,
sere burun do gaaranton batiini do bonontaaxun ya batten ŋa.
I wa seron sankundini,
i yinmenu na lagari sankuntaaxun ŋa.
14 Xa anke,
an ga da ke be xara nan toŋondi ti a yi,
mali a yi.
Sero be ga da an xaranŋundi ku fiinu yi,
an wa i kamanu tu.
15 Gelli an gaa leminaaxun ŋa,
an wa Safandi Sennun tu.
I ra wa fontuwaaxun kinni an ŋa,
a gaa an kandana katta kisiyen ŋa ti danqanaaxun ŋa Isa Alimasiiwu* kanma.
16 Safandi Sennen su safe ti Alla Fanka Sennen deemanden ya yi.
Ken ya ni nafan gaa i ya :
i ra gaa seren xaranŋundini,
i ra gaa seren bakka sankon ŋa,
i ra gaa seren teleŋondini,
i ra gaa seren xaayana katta teleŋontaaxun ŋa.
17 Ke su ni ya,
Alla seren na katu tinmene na i moxo sirondi katta fosiriɲanŋen su yi.