[Kuuɲinde]
1
Ke bataaxe wa gilli inke Pawulu yi,
Alla kome ga ni in ŋa,
n ɲa Isa Alimasiiwu xa danŋa faare yi.
N na Alla sere sugandinton kanda katta tonŋun do liimaanagankaaxun ŋa,
ke be do muuminaaxun gaa me wuttu.
2 Ken moxo,
i na katu i jikken roono bireyi duumanten ŋa.
Alla ke be ga nta gaarana,
a ya n da ke bireye laayidun wutu o da gelli ganninxase.
3 Waxati rakutunten ga tinme,
Alla ke be ga ni o kisindaanan ŋa,
a da i digaamun koyi in ŋa ti a ga da faarannaaxu ke be xaliifa in ŋa,
na in ɲaamari nan ti in na i kiɲandi.
4 Bataaxe ke na katta anken Tiito ya yi,
n leminan haxiixa diinan noxon ŋa,
diina ke be ga da o su kafu.
Baaba Alla do o Kama Isa Alimasiiwu gan na i neeman do i horoman koyi axa yi.
[Kireeti batijaman yinmanko]
5 An ga da wari in ga da an toxo Kireeti yi,
ken ni ya fiinu be ga toxo,
i yaaxe ga ma bogu,
an na i yaaxe bagandi.
Debe su,
an na xirisu ro i yinmen ŋa xoyi nke yinme ga da an ɲaamari moxo be.
6 Yella su ma xawa ɲiini xirise yi.
A nan ɲa sere yi,
a wasedunten gaa ti i yaqen baane yi.
A renmun nan ɲa toŋondinto yi,
murutiye do moxo bure su tuhuuma ma xawa ɲiini i kanma.
7 Yella su ma xawa ɲaana batijaman koroosindaanan ŋa,
baawo Alla gollun xaliifanton na a ya yi.
A n maxa ɲa dundare,
a n maxa ɲa buttaana,
a n maxa ɲa minnaana,
a n maxa ɲa gajalla yi.
A n maxa ɲa naaburunxannaana bure yi.
8 A n ɲa mukkunjaatigi sire yi,
nan ɲa fisirixannaana yi.
A n ɲa haqilante yi,
seri teleŋonte,
seri senne,
a ra gaa i yinme danŋa.
9 A n ɲa sere yi,
a tokkinten gaa saxiiron digaamen ŋa,
ke be do fi xaranŋunton gaa me wuttu.
Ken moxo,
a na katu duruxotoye kinni seron ŋa ti xaranŋundi sahanton ŋa.
Sere be ga na a kuta,
an na a kaman faamundi.
[Xaranmoxo gaaranto]
10 Tonŋu,
murutinten nan gaba,
sakkati Yehuudiyanu tuubinto ku.
I ya na seron sankundini ti battaran digaamun ŋa.
11 I raqun raga de,
baawo i na ka muumon ya bonondini.
I ga ma xawa seron xaranŋundini xaranŋu be yi,
i na ken ya xaranŋundini,
fomuurimoxo buraaxu saabu da.
12 I yinmenu du baananbe,
i xayifaare¤,
a ti :
« Kireetinkon gaarana ya abada,
fonɲaati buru ya ni,
fuurinto,
i haqilun nta fo wo fo yi,
yigeye ga fe ! »
13 Ke seedaaxu ni tonŋun ya yi.
Ken kuŋa,
i baxa-baxa siri kuudo i danqanaaxun na saha.
14 I n maxa tokki do Yehuudiyanun gaarantanxiisanun ŋa.
Ku be gaa i falle koyini tonŋun ŋa,
i n maxa i fi ɲaamarindixannun batu.
Kun feti fo seron ɲaamarindixannun ga fe.
15 Fon su sennen ya yi seri sennun da.
Xa seri sobinto,
i ga bara danqanaaxunu,
fo wo fo senne feti i da,
baawo i haqilun do i sinmayun su sobinton ya ni.
16 I wa a koono i raqun ŋa nan ti i wa Alla tu,
xa i gollun wa Alla nakkarini.
Alla maxa,
i xoninton ya ni,
murutinton ya ni,
fo siri baane nta warini i gollun ŋa.