[Biremoxo sire]
2
Xa anken Tiito,
ke be do xaranŋundi sahanten gaa me wuttu,
ken ko.
2 A ko yugu xason da nan ti i nan katu i du da,
i nan ɲa sero yi,
i do daroyen gan xawa,
nan ɲa haqilanto yi,
i nan ɲa sere sahaabanto yi danqanaaxun do xanuyen do muɲiyen noxon ŋa.
3 Yaxarin xason xa,
ken moxo baane ya ni,
i nan bire xo Alla seri sennu,
i nan maxa ɲa botoburundaano yi,
i nan maxa ɲa sero yi,
reesendolon komonkacen gaa i xannun ŋa,
i na fo siren xaranŋundi.
4 Ken moxo,
i na yaxarinlentugunnun xaranŋundi kuudo i kiinanu do i renmun xanuyen na ro i ya.
5 I na ɲa haqilanto yi nan seno,
i na i naxaanun siiti do kaadungollun ŋa,
nan ɲa yaxarin siru,
na du maxayanqa i kiinanu da,
kuudo sere nan maxa Alla digaamen bonondi.
6 Ken moxo baane,
a ko yaxanbaanun xa da ti i nan ɲa haqilanto yi fi su yi.
7 An yinme nan ɲa misaale yi seron da ti an golli sirun ŋa.
An ga na ɲi xaranŋundini,
an xaranŋunden nan ɲa xaran laabante yi,
xaran gemunte.
8 An nan sefe ti digan sahanton ŋa,
sere ra ga nta bote kitta digaamu be yi.
Ken ŋa,
o xonnon wa yaagunu,
i ra nta fo bure su koono o xibaaren ŋa.
9 Komon na i du maxayanqa i kamanyugun da ti fin su yi,
na i liŋun dabari,
i do i nan maxa me kuta.
10 I nan maxa nanbara dabari,
i n xawa i duntenŋaaxun ya koyini ti fo wo fo yi.
Ken moxo,
xiima na ro o kisindaana Alla xaranŋunden ŋa fi su yi.
11 Ayiwa,
Alla neeman bange,
haadamarenmen su gaa kisini ti neema ke be yi.
12 Ken neema wa o xaranŋundini,
o gaa duna ke be yi saasa,
na o bogu Allankannanbalaaxun do duna daxanmuntafiinun ŋa,
na o xaranŋundi nan bire haqilantaaxun do teleŋontaaxun do muuminaaxun noxon ŋa.
13 O jikken gaa koota wulluliŋonte ke be yi o gaa a dukku,
ken ni Alla xooren nooron bangayen ya yi,
Alla ke ga ni o kisindaana Isa Alimasiiwu yi.
14 Aken ya n da du ɲa sadaxa nan kara o danŋa,
na o maxawasa bakka fo buren su yi.
A da o senondi,
na o ɲa i duudanjama sugandinten ŋa,
jama ke be gaa keɲene do golli siren su ɲanŋen ŋa.
15 Ayiwa,
an nan xawa ku fiinu ya xaranŋundini,
na duruxotoye kini seron ŋa,
an na i baxa-baxa ti kanda xote yi.
Maxa duŋe sere su gaa an roxono.