[Isanwaaxinun biremoxo]
3
Toŋondinton haqilun yanqandi nan ti i na du maxayanqa yinmankon do fankan da,
na i daro.
I moxosironton nan ɲi gollisiriɲanŋen su xanne maxa.
2 I nan maxa sere su diganburu,
i nan ɲa nooxu do sabarinto do seri mullu katta seren su yi.
3 An da a wari,
o xa yinmenu ma ɲi duŋene fo wo fo faamunu.
Ballaanon ya n ɲi o yi,
o sankunton ya n ɲi,
yonkiliŋun moxonma su komonkacen ya n ɲi o xannun ŋa.
O ɲi bireene biremoxo buren do besenxonnaaxun ya noxon ŋa.
Seren su da o xoni,
o yinmenu duurun xa da me xoni.
4 Xa Alla ke be ga ni o kisindaanan ŋa,
siroye be do xanuye be gaa a maxa katta haadamarenmun ŋa,
i ga bange,
5 a da o kisi.
A ma o kisi ti oku yinme golli teleŋonton ŋa de,
aayi,
a da o kisi ti i yinme hinneyen ya yi.
O saare saareyi kurunba* ti Alla Fanka Sennen ŋa,
ke be ga da o senondi,
na o kurunbaaxu,
a da o kisi ti ken ya yi.
6 A da ken Fanka Senne guuji o kanma ti Isa Alimasiiwu horoman ya yi,
o kisindaana.
7 A da ken ɲa ya,
kuudo o na ɲa seri teleŋonto yi ti a neeman ŋa.
O jikken gaa bireyi duumante ke be yi,
o na a xeye.
8 Ke ni saxiiron digaamen ya yi.
N wa a mulla an na ku fiinu xotondi seron maxa.
Ku be ga toŋondi ti Alla yi,
i na duruxoto na golli sirun dabari,
fo siren ya ni,
a na ɲa nafantafo seren su da.
9 Ayiwa,
an na kutandi xafunun wara,
ken do ganninkon taarixunun muurunde,
manqanŋu,
ken do annabi Muusa sariyan me kutande,
nafa su nta kun ŋa i gaa fo sirono.
10 Sere be ga na taxandiye ro jaman ŋa,
an na a gongo ta fana,
ta filla,
ken falle an na a kaman booxo bakka jaman ŋa.
11 An ga da ken wari sere su yi,
a ma teleŋo.
Junuubuɲaŋaanan ya ni,
a yinme ya na du kiitini.
[Pawulu ɲaamarindi lagare]
12 N ga na Haritemaasi do Tixiiki dubaananbe xayi katta an ŋa koota su,
duruxoto an nan ri in gemundi Nikapooli debe yi,
baawo in da a saata nan ti in na mullen ɲaana non ya yi.
13 An kiilun toxo Jenaasi yi,
sariyantuwaana ke,
a do Hapoolu,
kuudo fo wo fo nan maxa konto i ya i terende ke noxon ŋa.
14 O waaxinun xa nan xawa fisiriɲanŋen seerana ya,
kuudo i na katu sikki haaju jawun ŋa,
i n maxa ɲa nafanloxo yi.
15 N do sere su gaa yere,
o wa an kuuɲini.
O do ku be ga xanaaxu danqanaaxun noxo,
an na o kuuɲinden kiɲandi i ya.
Alla neeman gan na ɲa do axa su batten ŋa.