Filimooni 1

Ke bataaxe wa gilli nke Pawulu do o waaxi Timoote yi. Nke ɲa kasoranke do Isa Alimasiiwu toxon ya yi. O wa bataaxe ke xayini katta o golliɲanlenma, ken ga ni o xana Filimooni yi. 2 Bataaxe ke wa katta o waaxi yaxaren xa yi, ken ga ni Hapiya yi, kafiini o kapanlenma Harisipa yi, aken be ga da o deema gajanŋen ŋa, ken do isanjama ke be gaa me ɲiini anken Filimooni kan ŋa. 3 O Faaba Alla do Kamane Isa Alimasiiwu gan na i neeman do i horoman koyi axa yi.

4 Filimooni, n ga na ɲi Alla tiigana bire su, n wa a ɲaagana an da. 5 Ayiwa danqanaaxu be gaa an ŋa Kamane Isa Alimasiiwu kanma, a do xanuye be gaa an maxa katta Alla seri sennen su yi, n da ken xa mugu. 6 Ken kuŋa, danqanaaxu ke be gaa an ŋa, a do Alla fonnansiraaxu ke tuwaaxun be gaa an maxa, n wa Alla ɲaagana a gan na fo tallan kafu an siroyen ŋa ti ku fiinu yi, kuudo darontaaxun na senbe Kisindaanan ŋa. 7 N maarenme Filimooni, an da in sewondi moxo siri, n da duruxotoyen kita na a sababun ɲa xanuye be ga an maxa katta waaxinun ŋa. An da Alla seri sennun butte mura.

8 Ken kuŋa, isanwaaxaaxu ke be gaa o naxan ŋa saabu da, n saxunten wa a yi moxo siri, nan ti in ra wa an waajibini an gan n xawa ke be dabarini. 9 Ganta, n na a mulla na a muuru an maxa ti xanuye ke be gaa o naxan ya yi. Nke Pawulu me yugu xase, n gaa finna kason ŋa do Isa Alimasiiwu toxon ŋa, n na an xanjono Wonsiimu ya da, 10 Wonsiimu ke be ga ɲaŋi in da renme yi kason ŋa. 11 Fanan ŋa, nafa ma ɲi a yi an danŋa. Xa saasa, nafan wa a yi inke do anke su da. 12 N faayi a saagandini katta an ŋa, n yogo ya ni. 13 N gaa kaso ke be yi do Xibaari Liŋe batte, n ɲi a mulla na a toxo du maxa ya, kuudo a na sigi in da an batten ŋa. 14 Xa in nta a mulla na fo wo fo dabari a ga ma giri an ŋa, kuudo in nan maxa an killifi ti fosiriɲanŋen ŋa. N na a mulla an yinme ya nan duŋe ti a yi. 15 A ra wa ɲaana an do Wonsiimu ga fate waxati lamaane ya yi kuudo a na yille saagene katta an ŋa ma abada. 16 Ken kuŋa, kome kundun fe saasa de, a n fasu kome yi, waaxinxanan ya ni. Nke da a xanu siri, xa an ya n xawa a xanna diinanta inke yi ti haadamarenmaaxun do isanxaranlenmaaxun su yi. 17 Ken kuŋa, an gaa a sinmana nan ti an kapanlenman ya ni in ŋa su, an na a bisimilla xoyi in ya ga ni. 18 Ayiwa selli a ga da fo ya bonondi an da, ma an tanbo ya gaa a yi, an tanbo ke tuganden na inke ya yi keeta. 19 Nke Pawulu yinme ya n da ke safa ti in kitten ŋa nan ti : an tanbo ke tuganden na inke ya yi keeta. Nke tanbo be gaa an ŋa, n nta a koono an da, an yinme muuman ya ni. 20 Ayiwa in maarenme, an na ke nafa baane ɲaŋi in da ti Kamanen horoman ŋa. Duruxoto an na in butte mura ti Kisindaanan sababun ŋa. 21 N saxunten wa a yi nan ti in ga da fo wo fo muuru an maxa, an wa a dabarini. Ken ya ni in ga da ke bataaxe xayi katta an ŋa. N wa a tu nan ti an wa fo dabarini, fo be ga n xoto n ga da ke ko.

22 Ayiwa an na xosi konpe xa moxogemundi in da, baawo axa allanɲaageyun saabu da, n wa a jikki Alla wa riini in saaga axa yi. 23 I ga da in do Hepafara xa be raga do Isa Alimasiiwu xibaaren ŋa, a wa axa kuuɲini, 24 kafiini in golliɲanlenmo, Maarika do Lisitarooxo do Damasa, kafiini Luka yi.

25 Kamane Isa Alimasiiwu neeman gan na ɲa do axa batten ŋa.