Bataaxe katta Yehuudiyanu
[Allanlenmen darontaaxu]
1
Gannin ŋa, Alla ɲi sefene o seri fanon da ti annabinyinmun faarannaaxun ya yi ta gabe, a do moxo gabe. 2 Xa duna ku kiyi lagaru yi kuŋa, a sefene o da ti i renmen ya yi. Ken renme ya n da fo wo fo su kamanaaxun xeye gilli Alla yi. Alla da kanmun do ɲiiɲen taga ti a ya yi, a do fo be gaa i noxo. 3 Alla kallankaaxun nooron wa a yi, Alla yinme haxiixan ya ni tan. A wa fo wo fo su tigitini ti i araniyen digaamen ŋa. A da junuubunun xafari. Ken falle, a taaxu Alla kallanken tayen ŋa kanmu. 4 Ken saabuda, a da darontaaxun kita nan xoto maliikannun ŋa, na renmaaxun xiiman xeye gilli Alla yi, ke be maliikannun ga ma a kita.[Ke renme n dara maliikannun ŋa]
5 Ken kuŋa in na axa tirindi : Yaala Alla demu a koono kan maliika baane danŋa abada nan ti :
« N da an renmaaxu,
n ɲaŋi an da faabe yi lenki. » ?*
Baawo fo be gaa xo maliikannun kun xibaaren ŋa, a ma demu a koono nan ti :
« N wa ɲaana a da faabe,
a na ɲaŋi in da renme.¤ »*
6 Xa Alla ga da i sooman ken xayi katta duna yi bire be, a ti ya :
« Maliikannen su nan sujudi a da. »*
7 Maliikannun kun kun ŋa, Alla ti ya :
« Ike wa i maliikannun xayini xo fanke,
a wa i golliɲaŋundini a da xo yinbinkuma. »*
8 Xa renme ke ken kuŋa, a ti ya :
« Alla wo ! An tunkantaaxaaden wa laamene ma abada.
An wa an jaman marana ti an teleŋontaaxun tunkandokkon ŋa. »
9 « An wa teleŋontaaxun xanna, na bonontaaxun xoni.
Kamane, ken ya n sigi an Alla ga da an sugandi na an daari ti sewoyen ten ŋa,
na an sugandi an meenun su kanma. »*
10 Nan ti xadi :
« Kamanen wo,
joŋaarun ŋa, an ya n da ɲiiɲen nooni na a banxu,
kanfaton ni an kittiragollen ya.
11 Kun su ɲemeene ya, xa anken toqo ya,
i su xasoono ya xo yiraame,
12 an na i kulaadi xo yiran xase, na i faraaxu xo yiranjape.
Xa anken ken nta yillene, an biren nta ɲemeene ».*
13 Yaala Alla demu a koono kan maliika baane danŋa abada nan ti :
« Taaxu in tayen ŋa, ma in ga na an xonnon ɲa taaden ŋa an tanbekkon wure. » ?*
14 Yaala maliikannun feti yonkingankon ya yi ba ? Ku beenu gaa kisiyen xeyen wuttu, i xidimene Alla da ti kun toxon ya yi.