[Kuuɲinde]
1
Ke bataaxe wa gilli inke Yaaxuba yi, Alla do Kamane Isa Alimasiiwu xidimaana, a wa katta Banisirayila xabiilanun tanmi do fillo ku be sanqinton gaa do duna yi, n wa axa kuuɲini.[Muɲiye]
2 Ayiwa, n waaxinu, jaaraben moxonma su ga na axa kita, axa na ɲaxali moxo siri, 3 baawo axa wa a tu nan ti axa liimaanagankaaxun gaatanden saarene ti muɲiyen ya yi. 4 Axa nan xawa muɲini ya ma xenpa, ma axa gan ɲa seri tinmanton ŋa fon su yi, fo wo fo ga nta axa kumana. 5 Fontuwaaxun ga na axa du baananbe be kuma, an na a ɲaaga Alla be gaa a kinni, a na a kini an ŋa. Alla ya na fontuwaaxun kinni seren su yi ti fonnansiraaxun ŋa, worotinde nta do a batte. 6 Ganta, an na a ɲaaga ti danqanaaxu, maxa sikka. Baawo sere wo sere gaa sikkana, a kaman na xo geeji banbuusen ya yi, fanken gaa a girinanxenundini. 7 Ken kaman nan maxa a ro i haqilen ŋa nan ti i wa Kamanen kuye kitta. 8 Sondonfillon ya ni a kaman ŋa, a na daga dooke, a na ri dooke.
[Misikiinen do banna]
9 Ayiwa, waaxi maxayanqante, an kunkun wutu, baawo Alla da an wurugi. 10 Waaxi banna, an xa na an kunkun wutu, baawo Alla da an maxayanqa. Na a tuguti bannan na xo sokkifuugen ya yi, a nta dallana. 11 Kiyen do i tawoyi xooren ga na bogu, a wa sokken kaawandini, fuugen na konke, a faranfaroyen bogu a yi. Bannan xa na ken moxo baane ya yi, a do i fiinun su sankunu ya.
[Jaarabindu]
12 Wulluliŋontaaxun wa seren da, sere ke be ga muɲi jaaraben wure. Baawo a muɲiyen ga ma bono a maxa su, Alla ga da ŋaliyintoore ke be laayidun wutu i xannaanon da, a wa a kitta. 13 Sere be ga na jaarabi na fo bure dabari, a kaman nan maxa ti : « Alla ya n da in jaarabi », baawo fo wo fo ra nta Alla jaarabini katta fo bure yi, a xa yinme nta sere su jaarabini katta fo bure yi. 14 Ganta, sere su yinme yonkin liŋun ya na an jaarabini, na an xaɲa, na an wara fiburiɲanŋen ŋa. 15 Ken yonkiliŋu ga na noxon wutu bire be, a na saare ti junuubun ŋa, junuubun xa ga na xooro, a na saare ti kallen ŋa.
16 Ken kuŋa, n maarenliŋu, xa maxa du sankundi. 17 Seren gaa kuye fo sire su kitta, kuye ke tinmanten ya ga ni, a giri Alla ya yi kanmun ŋa, xason do kiyen tagandaana. A nta faraaxini, a nta yillene xo sirawu. 18 A da a rakutu na bireyi kurunban kini o yi ti digan tonŋunten ŋa. A da ken ɲa ya, kuudo o na ɲa a tagefoonun fo fanan ŋa.
19 N maarenliŋu, axa nan xawa a tuunu nan ti : sere, jawo terinkene, xa maxa jawo sefene, maxa jawo buttu. 20 Na a tuguti, haadamarenmen mameyen ra nta teleŋontaaxu dabarini Alla danŋa. 21 Ken kuŋa, xa boore bakka sobintaaxun do bonoyi danginten su yi. Alla digaame ke be gaa axa sondomun ŋa, xa duŋe a yi ti nooxaaxu, a ra wa axa yonkinun kisini.
22 Xa maxa xenpe Alla digaame ke mukken baane yi de, xa na a gollen dabari axa nan maxa axa du goto. 23 Baawo sere be gaa Alla digaamen mukku, xa a ga nta a golle dabarini, ken kaman na xo sere be gaa i du ya faayini dunŋaren ŋa i gaa moxo be. 24 A ga na du faayi nan daga, kuruma a na mungu do i giyan moxon ŋa. 25 Xa, Alla sariya tinmante ke be gaa seren hooraaxunu, i be ga na a guuga siri, na a digaamen batu nan tokki do a yi, a ga ma mungu, a ga na sariyan gollen dabari, a wulluliŋontaaxu ti i golli dabarinton ŋa.
26 A gaa sere be maxa nan ti ike ni diinadunka siren ya yi, xa an ra ga nta tikkiti an neenen ŋa, an da du neene, an diinan ni xafun ya yi. 27 Diina laabanten ga ni ke yi Baaba Alla maxa, mexe su ga nta a yi, a faayi : nan hinne giigiirun do kiinakariidonun ŋa, na i deema i xotoyen ŋa, nan laato bakka duna xanintafiinun ŋa.