[Na seron faso me yi]
2
N waaxinu, axa kun danqanaaxu ti o kaman dare Isa Alimasiiwu yi, ken kuŋa xa maxa seron faso me yi. 2 Misaale : sere yogo ri axa jama ke yi, kanŋen doronman wa a kitten ŋa, yiran kallanŋunto wa rondini a yi. Misikiine yogo xa do i yiran mexenton ri. 3 Yirankallanŋunton gaa rondini ke be yi, axa yaaxon xenne a ya yi nan ti a da : « Anke, li taaxu serixoorantaaxuran ŋa. » Axa na ti misikiine ke xa da : « Anke, toxo sikki non ŋa, » walla axa na ti a da : « Taaxu o taanu ku yi ɲiiɲen ŋa. » 4 Axa ga na ken ɲa, axa ma kiiti seron naxan ŋa ba ? Axa ma ɲa kiitaana ŋanniyiburugumu yi ba ?5 N maarenliŋu, xa terinke : xoyi Alla ya ma duna ku misikiinu sugandi na liimaanagankaaxun bannaaxun kini i ya ba ? Alla ya ma i tunkaaxun laayidun wutu i xananun da, i na a xeye ba ? 6 Xa axakun wa misikiinun roxono, na a ɲi xa, bannanun ya na axa toorono na axa kurunta do kiitikutinoqunun ŋa, ma kan moxo ? 7 Toxo sire ke be saxunten ga axa yi, xoyi ikun bannanun ya nta a kanma na a bonondi ba ?
8 Alla sariya ke be ga n xoora sariyan su yi, safandi sennun noxo ŋa, ken ni ya :
« An kapanlenman xanu xoyi an yinme moxo.* »
Selli axa ga na ken sariya maxafaga, axa wa ɲaana fosiriɲaŋaano yi. 9 Xa, axa ga na fasanŋuntaaxun ro seron do me naxa, axa da junuubun dabari. Sariyan wa axa ragana na a sababun ɲa axa ga da a kuta. 10 Baawo sere be ga da sariyan su batu, an ga na futuxi ti sariyan tonbo baane, an da sariyan su kuta. 11 Ke be ga ti : « Maxa jeeni », a ya n yille tini : « Maxa sere kari.* » An ga da sere kari su, hari an ga ma jeeni, an da sariyan kuta. 12 Sariya ke be gaa axa hooraaxunu, axa kiitini ti ken sariya ya yi. Ken kuŋa, xa da axa sefon do axa gollun su gemundi ken sariya yi. 13 Hinneye ga nta sere be yi, kiiten koota, hinneye nta ɲaana a kaman xa da. Hinneyen ya n katta kiiten da.
[Danqanaaxun do ɲangollu]
14 N waaxinu, sere be ga na ti danqanaaxun wa ike maxa, xa ɲangolli siru ga nta a kaman maxa, ken danqanaaxu na manne sirono ? Xoyi a ra wa a kaman kisini ba ? 15 Selli feetufataado ma naxafankori ga axa waaxiyugo yogo ma axa waaxiyaxare yogo yi, 16 an ga na ti a da : « Xeeri wa do an ŋa, hari na mullen bogu an ŋa, na dullen bogu an ŋa, » an xa ma fo wo fo kini a yi a gaa dulle do feeto bakka a yi, ken na manne sirono ken kaman ŋa ? 17 Ken kuŋa, danqanaaxun ga na ɲa ken moxo ya yi, ɲangolle ga nta kafiini a yi, a furen ya ni.
18 Xa, yogo ra wa tini : « Danqanaaxun ya na anken maxa, ɲangollen ya na inke xa maxa. » N na a jaabi nan ti : « An danqanaaxun koyi in ŋa kuŋa, ɲangolle ga nta yi. Nke ken na in danqanaaxun koyini an ŋa ti in ɲangollun ya yi. » 19 An saxunten wa a yi nan ti Alla ni baane* ya yi, ken siren ya ni ke. Jinnanun xa saxunten wa ken ŋa wo, ma i nan saralle xaaxantaaxun maxa. 20 Soorunbali ke, an nta a tu nan ti ɲangolle ga nta kapa danqanaaxu be, xafun ya ni ba ? 21 O faaba Ibirahiima ga da i renme Isiyaaxa ro sadaxindiran kanma* ya ni, a teleŋontaaxun ga tuyi ti a ɲangollen ŋa. 22 An da a wari, Ibirahiima ɲangollun ya n kafi a danqanaaxun ŋa. Kun ɲangollu ya saabu da, a danqanaaxu ke ga tinme. 23 Tawureeta ga da ke be ko, a sabati, a ga ti :
« Ibirahiima toŋondi ti Alla yi, a jaate baarinte yi*. »
I da a xiri Alla xana*. 24 An da a wari, seren teleŋontaaxun tuyini ti a ɲangollun ya yi, danqanaaxu ke baane fe.