[Kuuɲinde]
1
Ke bataaxe wa gilli inke Piyeeri yi, Isa Alimasiiwu faare ga ni, a wa katta Alla jama sugandinte be sanqinten gaa mukkaaxun ŋa Ponti maran do Galaca maran ŋa, a do Kapadooke do Haasi maro, kafiini Bituuni¤ maran ŋa. 2 Baaba Alla da axa sugandi xo a ga da a rakutu moxo be, na axa senondi ti i Fanka Sennen ŋa, kuudo axa na Isa Alimasiiwu batu, a fori sanpanton xa wa axa senondini. Neeman do xeerin gan na guuji axa kanma.[Kisiyen jikke]
3 Tiigeyen wa Alla da, o kaman Isa Alimasiiwu Faaba. Ti a hinneyi xooren ŋa, a da o saara saareyi kurunba ti Isa Alimasiiwu wundiyen ŋa bakka furun naxa, kuudo o na jikki ŋalinten do 4 xeyen kita. Ke xeye nta bonno, a nta gurujeene, a nta furiini. A wa taaxiini axa da Alla noqu kanmun ŋa. 5 Alla senben wa axakun tangana ti danqanaaxun ŋa kuudo na axa kisi. Ken kisiye moxosironten ya ni nan bange duna lagarun ŋa. 6 Ken saabu da, axa wa sewono, hari waajibin ya ga ni axa nan suno waxati lamaane ti jaarabu yogonu yi. 7 Kun jaarabu maanan ni axa danqanaaxun xiiman ya na tuyi. Kanŋen ra wa bonno, xa i wa a roono yinben ŋa na a jaarabi ma kan hoore ni. Axa danqanaaxun xiiman xa jaarabini ken moxo ya yi. Isa Alimasiiwu ga na bange, ken na ɲa axa da tiigande do nooro do darontaaxu yi axa danqanaaxun saabu da. 8 Axa ma demu Isa walla, xa a xanuyen wa axa yi. Hari ke saasa, axa yaaxen nta a yi, xa axa da axa saxiiraaxun ro a kanma, ken wa axa sewondini sewoye be ga n dara, xenpa ga nta a yi. 9 Na a sababun ɲa axa wa axa danqanaaxun tonon kitta, ken ga ni axa yonkinun kisiyen ŋa.
[Annabinyinmun xidimeyinme]
10 Fi be gaa taŋene ke kisiye yi, annabinyinmun da muurunden do jaganden ɲa a kanma. Neema be laayidun ga wuti axa da, i da a ko. 11 Sugandiyenmen yonkin ya n ɲi annabinyinmu ku yi. Sugandiyenmen gaa toora su walla, a do nooro su gaa riini ken su falle, Yonki ke da a su moxon ko i da i ɲanŋen kaane. Annabinyinmu ku jagandi a riiwaxatin do a riimoxon kanma. 12 Alla da a bangandi i da nan ti i ga ɲi xidimene ti ku fiinu beenu yi, i nta i yinmenu da, i na axa ya da. Ku be gaa Xibaari Liŋen kiɲandini axa yi waca kuŋa, i na ku fiinu xa kiɲandini axa yi ti Fanka Senne ke be ga giri kanmun ŋa ya. Hari maliikannun yinme wa natene do a tuyiyen ŋa.
[Isagankon maxawaseye]
13 Ken saabu da, xa da axa moxo sirondi, axa na axa kiilun toxo du yi. Alla gaa neema ke be kuyen ɲaana axa da Isa Alimasiiwu bange koota, xa da axa jikken su ro ken ya kanma. 14 Yonkiliŋu be ga ɲi axa yi ganni axa ga ɲi sankuntaaxun ŋa, xa maxa ken batu xo leminen gaa i saaran batta moxo be. 15 Xa ganta, Alla ke be ga da axa xiri, a sennen ya ni, axa xa nan seno axa duuragemoxon su yi xoyi a moxo. 16 Baawo a safanten wa Tawureetan ŋa nan ti :
« Xa ɲa senonto yi, baawo in sennen ya ni.* »
17 Axa gaa ke be xilli Baaba axa allanɲaageyun noxon ŋa de, a ya na sere su kiitini ti i gollun ŋa, a nta sere fasono sere yi. Ken kuŋa, axa gaa wuce su ɲaana ɲiiɲen kanma, allankannen nan ɲi axa biremoxon ŋa. 18 Axa wa a tu nan ti : axa ga da axa faabanu biremoxo xafu ke be xeye, Alla ma axa maxawasa bakka ken ŋa ti fo be gaa bonno, xo kanŋe ma xaalisixulle. 19 Xa, a da axa maxawasa ti Sugandiyenmen fori kallanŋunten ya yi. A ya n ɲa xo jaxanlenme, loojuru su ga nta a yi, yella baanen ga nta a yi. 20 Gelli duna ga ma tage, Alla da Sugandiyenmen sugandi, xa ku koota lagaru, a da a bangandi axa da. 21 Axa saxu Alla yi ti Sugandiyenme ke ya yi, Alla ke be ga da a wundu bakka furun naxan ŋa na darontaaxun kini a yi. Ken saabu da, axa da axa danqanaaxun do axa jikken saxu Alla kanma.
22 Axa da axa yonkinun senondi ti tonŋun batiyen ŋa, kuudo na axa waaxinun xanu ti sondonlaabantaaxu yi. Ken kuŋa, xa da me xanu ti xanuyi haxiixan ŋa ti axa sondomun su yi. 23 Baawo, axa saare saareyi kurunba ya yi. Axa ma bogu soxoodi be gaa motto, axa bogu soxoodi be ga nta motto ya, Alla digan biranten ya ni, a gaa duumene. 24 Baawo a safanten wa annabi Yesayaahu kitaaben ŋa nan ti :
« Haadamarenmen su na xo sokken ya.
A nooron na xo sokkifuugen ya.
Sokki xayen na kaawa,
fuugen na yere.*
25 Xa Kamanen digaame, a duumene ya ma abada.* »
Ken digaame ni i ga da Xibaari Liŋe ke be kiɲandi axa yi ya.