[Gongonde katta bannanun ŋa]
5
Xa terinke ! Bannanu, xa wu, axa nan sonqo na a sababun ɲa bone ke be gaa riini xenu axa yi ! 2 Axa naaburen moti ko, xaasun da axa yiraamun yiga ! 3 Axa kanŋen do axa xaalisixullen xaaxi. Ken xaaxiye ya n ɲaana axa da seeda, a na axa fatantiyun yiga xo yinbe. Duna ɲamebiren ya ni, axa ga da naaburen kafu me yi. 4 Xa da a faayi ke, ku be ga golli axa teenun ŋa, axa da i tanpiyen xuda. I wurugexannen kiɲe Kurun Kaman ŋa. 5 Axa da axa bireyen ɲa liŋoyen do dunarankaaxun ŋa ɲiiɲen kanma, axa yige nan mini nan kato katta karakootan ŋa xo batundo. 6 Axa wa teleŋonten kiiti na i kari, ikun nta hari i kitten saagana axa yi.[Muɲiye]
7 Ken ya ni, n waaxinu, xa muɲi ma Kamanen ga n ri koota be. Axa da soxaanan faayi tan, a gaa muɲini na ɲiiɲen yitti ren siru dugu, gelli kandaara ma kawulenu. 8 Ayiwa axa xa n muɲi kundun ya yi de, axa na axa buttun xoto, baawo Kamanen ribiren tinko.
9 N waaxinu, xa maxa fido me wure yi de, kiiten nan maxa axa raga, baawo kiitikutaanan siginten ya faayi fonlaqen ŋa. 10 N waaxinu, ke be gaa taŋene tanpiyen do muɲiyen ŋa, o n xawa yaaxene annabinyinmun ya yi, i be ga sefe ti Tunka Duumanten toxon ŋa. 11 Tonŋu, ku be ga da xotan muɲi, o na i ragana wulluliŋonton ya yi. Annabi Ayuuba ga da xota be muɲi, axa da a xibaaren mugu. Tunka Duumanten ga lagari fi be ɲaana a da, axa da ken xa faamu. Kamanen ni hinnaana xoore ya yi, a siroyen nan gaba.
[Xirindi lagare]
12 N waaxinu, ke be ga n xoto a su yi, ken ni ya, axa nan maxa kuna ! Xa maxa kuna ti kanmun ŋa, xa maxa kuna ti ɲiiɲen ŋa. Xa maxa kuna moxo su danben ŋa. Axa ga na ti : « yabo », a nan ɲa « yabo ». Axa ga na ti : « aayi », « aayi » ya ni, kuudo kiiten nan maxa xenu axa kanma*.
13 Sere wa kapa axa yi xotan gaa a kanma ba ? A kaman na Alla ɲaaga. Sere wa kapa axa yi a gaa sewono ba ? A kaman nan suugu na Alla tiiga. 14 Sere wa kapa axa yi, a ga ma saha ba ? A na isanjaman xirisun xiri, i na a daari ti Kamane Isa toxon ŋa, na Alla ɲaaga a da. 15 I ga na Alla ɲaaga ti danqanaaxun ŋa, watunte ke wa kisiini, Kamanen na a girindi, selli junuubu gaa a yi, a na xafarini. 16 Axa do me naxa, baane su n xiire ti i junuubunun ŋa, na Alla ɲaaga me da, ken ŋa axa na saha. Bareki xoore ya na sere teleŋonten allanɲaageyen ŋa. 17 O me haadamarenme ya ni annabi Hiliyaasu yi. Xa a ga dalla allanɲaageyen ŋa ti kanmen n maxa texe, kanme ma texe ɲiiɲen kanma xaaxu sikki do taxande*. 18 Ken falle, a saage Alla ɲaagana xadi, kanmen texe*, ɲiiɲen da i funtifoonun bagandi.