[Alla xonno]
4
Ayiwa, manqanŋu ku be do gajanŋu ku be gaa axa naxa, i gilli minne ? I nta gilli yonkiliŋu ke be gaa gajanŋa axa faton ya yi ba ? 2 Fo yogo natan wa axa yi, a nta axa maxa, axa na xosi axa moxosirondi ti sere kallen ŋa. Fo yogo suuxen wa axa yi, a nta axa maxa, axa na xosi axa du sedi gajanŋen do fitinan noxon ŋa. Ke be ga n liŋi axa da, a nta axa maxa, baawo axa ma a muuru Alla yi. 3 Axa wa ɲaagene, axa nta kitene, baawo axa ma ɲaage moxo sire yi : axa ɲaage ya kuudo axa na katu axa yonkiliŋuntafiinun dabarini. 4 Ku jeenaano ku, keti axa ma a tu nan ti dunadunxanuyen ni allanxonnaaxun ya ni ? Sere su gaa a mulla na duna ya ɲa xana yi, an da Alla ɲa xonnen ya yi. 5 Axa da a sinma Safandi Sennun da ke ko xafu ya yi, a ga ti :« A ga da yonki ke be ro o yi, a suuxunu a yi ya buru* » ?
6 Xa, a ga da neema ke be ɲa o da, ken ya xooren ni. Ken ya ni Safandi Sennun ga ti :
« Alla wa dundaren gajanŋa, xa a na nooxen ken neemana ya*. »
7 Xa da du maxayanqa Alla da. Xa da Ibiliisa gaja, a na wuru bakka axa yi. 8 Xa tinko Alla yi, a xa na tinko axa yi. Xa da axa kittun senondi bakka junuubun ŋa, ku junuubunto ku. Xa da axa sondomun laabandi, ku sondonfillogumu ku. 9 Ken kuŋa, xa toore, xa suno, xa wu. Xa da axa soyen faraaxu wuyen ŋa, xa da axa sewoyen ɲa suno. 10 Xa da du maxayanqa Kamanen jon ŋa, a na axa wurugi.
[Duukonŋe]
11 Ayiwa in waaxi, xa maxa me botoburu. Sere be ga na i waaxin botoburu, ma an ga na a kiiti, an da sariyan ya botoburu, an da sariyan ya kiiti. Sere be ken xa ga na sariyan kiiti, an ma a killen tera, an da du ɲa a kiitaanan ya yi. 12 Alla baane ya ni sariyagumen do kiitaanan ŋa, a baane ya n katta seren kisini, ma na seren kari. Anke, an xa ni ko yi, an gaa an kapanlenman kiitini ?
13 Xa terinke ! Axakun be gaa tini : « Lenki walla xunbane, o wa dagana ke debi fulaane, o na siine ɲa non ŋa, o na o julaaxun dabari na naaburen kita. » 14 Axa nta hari a tu xunbane ke be gaa axa kitana. Baawo axa na xo ginen fankon ya yi, a na waxati lamaane ya ɲaana, a na sanku. 15 Axa nan xawa tini du ya : « Alla ga na duŋe, o na bire, o na ke do ke ɲa. » 16 Xa, axa na du koono ti fi xooron ya yi, duukonŋen ken xa moxonma su ma ɲa. 17 Ken kuŋa, sere su gaa fi siren tu, an ga nta a dabarini, ken na an kanma junuubun ya yi.