[Neenen kasaara]
3
N waaxinu, axa su n maxa ɲa xaranmoxonu yi de ! Axa na a tu nan ti kiiti xote ya na oku xaranmoxonu kanma. 2 Baawo ta gabe ya ni o gaa futuxini, xa futuxiye ga nta sere be kitta i sefen noxon ŋa, ken kaman ni sere tinmanten ya yi. A ra wa i du da.3 Xaraben ga na ro sin raqen ŋa kuudo a n kande, a fate ke muuman kandeene ya. 4 Xa da jiidunfuurun faayi ke : i do i kame xooroye, fanka xooren gaa i yontono, xa sunbaadinlen bucinne ya na a kandana, na a deni noqu be ga n liŋi sunbandaanan da. 5 Neenen na ken moxo baane ya yi. Suufu lamaane ya ni, xa a wa du koono ti fi xooron ŋa. An ma a wari ? Yinbi lamaane, a na gunnen su buyi. 6 Tonŋu, neenen ni yinben ya yi. Fi burun su jaatigi ya ni, a kafiini o faten ya yi, a ya na faten su mexendini. A ya na o dunarakutiyen xa su bonondi, aken neene yinme yinben gilli Jahannaba ya yi. 7 Tagefo su nta du yi, haadamarenmen ra ga nta ke be marana, na a wutu fonyaatu, yeliŋu, gonxiilanu, kafiini jiidufoonu, a da a su mara xa. 8 Xa neenen ke, sere su ra nta ken marana. Fo bure ya ni, a nta tanpini fo buru ɲanŋen ŋa ! Tooxi duuro, a tooxen ra wa seren karini. 9 O na Baaba tiigana ti a ya yi, o Kama, haadamarenmen xa be ga tage bakka Alla sawuran ŋa, o na a xa langana ti a ya yi. 10 Tiiganden do langanden su bakka ken raxa baane ya yi. N waaxinu, ken ma xawa lewu ! 11 Xoyi ji liŋen do ji xaraxacen ra wa bakka jinyaaxa baanen ŋa ba ? 12 N waaxinu, xoyi dinditinŋen ra wa jayituuna renmun saarana ba ? Ma reesetinŋen ra wa dindi renmun saarana ? Jinyaaxa xaraxace xa ra nta ji liŋe toyini.
[Alla fontuwaaxu]
13 Ko baane na axa yi fontuwaana ga ni, haqilanten ga ni ? Ayiwa, a kaman na a koyi ti i biremoxon siren do ɲangollun ŋa ti nooxaaxun do fontuwaaxun ŋa. 14 Xa, haasidaaxu xoten do dundaraaxun ya gaa axa sondomun ŋa, xa maxa du jakki ti axa fontuwaaxun ŋa, xa maxa tonŋun faraaxu gaaren ŋa. 15 Ken fontuwaaxu ma giri Alla yi kanmun ŋa, a giri duna ya yi, sankuntaaxun ya ni, seetantuwaaxun ya ni. 16 Baawo haasidaaxun do dundaraaxun ya gaa noqu su yi, ɲaxamiyen do golli bure ke danben su ya na non ŋa. 17 Xa, fontuwaaxu be gaa gilli Alla yi kanmun ŋa, fon fana, a sennen ya ni, xeerin xa wa a yi, nooxaaxun wa a yi, genmen wa a yi, hinneyen do nafan gaben wa a yi, faasanden nta a yi, munaafaxaaxun nta a yi. 18 Sere be gaa xeeri muurunu, xeerin yitten lori, a na saare ti teleŋontaaxun ŋa.