2
Ayiwa ken kuŋa, xa da buroyen su sedi, fiinu be gaa xoyi nanbarantaaxun su, munaafaxaaxu, besenxonnaaxu, a do meetoxonbononden su. 2 Konbojixattin tun gaa lendunben ragana moxo be yi, axa xa na Alla daalen tu xoten ro du yi kundun ŋa, a sennen ya ni. Ken ŋa axa na xooro kisiyen noxon ŋa. 3 Xoyi a ga sefe Jabuurin noxon ŋa nan ti :« Axa ga da Kamanen temu, a liŋen ni sa* ! »
[Alla batijaman gonbontuufa]
4 Xa tinko Kamanen ŋa, gidi ŋalinten ya ni, seron da a sedi, xa Alla da a sugandi na a kallankaaxu. 5 Ayiwa, axa xa nan ɲa xoyi gidi ŋalinto, nan tage batika senne yi. Ken ŋa, axa na sadaxakiɲandijama senne taga nan ɲa sadaxakiɲandaano yi Alla da kuudo na allansadaxon sadaxi. Alla na duŋe sadaxo ku yi ti Isa Alimasiiwu yi. 6 Na a sababun ɲa, Alla ga da a ko Safandi Sennun ŋa nan ti :
« N faayi gaa gidindunga tontono Siwoona deben ŋa,
gonbontuufan ya ni, tuufa sugandinte, tuufa kallanke.
Sere su nda danqanaaxu ti a yi, a kaman nta yaagunu abada.* »
7 Ken kuŋa, axakun beenu ga saxu a yi, a ɲa axa da daroye yi. Xa ku beenu ga ma saxu a yi, a safe nan ti ikun da :
« Tagandaanon ga bara tuufa ke be yi,
ken ya n xosi ɲa gonbontuufan ŋa.* »
8 A koni noqu tana nan ti :
« Finbigiden ya ni, xenundindigiden ya ni.* »
Seron finbi a yi, na a sababun ɲa i ga bara Alla daalen terinkana. Alla ya n da ken rakutu i da.
9 Xa axakun ni xabiila sugandinten ya,* tunkansadaxakiɲandijama, xabiila senne.* Axa ya ni Alla ga da jama ke be sugandi kuudo axa na i fiisiriɲanŋen gangu,* aken Alla ya n da axa bagandi biten ŋa, na axa geesu katta i nooro kallanken ŋa. 10 Ganni, Alla sero ma ɲi axa yi, xa saasa ke, axa ɲa a sero yi.* Ganni, Alla ma ɲi a ga hinne axa yi, xa saasa ke, a hinne axa yi.*
[Isanxaranlenman duuragemoxo]
11 N maaren liŋu, axa na ke duna noxon ŋa xoyi mukku danginto ya. Ken kuŋa, n wa a muurunu axa su maxa nan ti axa nan maxa sukke do yonkiliŋun batten ŋa, ken be ga ni yonkin xonnen ŋa. 12 Axa gaa allankannanbalinun noxon ya yi, xa da axa du raga moxo sire yi. Ken moxo, i ga na ɲi axa botoburunu xo golliburiɲaŋaano, i na axa golli sirun wari. Ken ŋa, i na darontaaxun saaga Alla yi a riikoota.
13 Haadamarenmun ga da sere wo sere ɲa yinmanke, xa na du maxayanqa a da ti Kamanen ŋa : ken ga na ɲa tunkanyugon ya yi ba, kandan gaa a maxa, 14 ma maranyinmanke, a gaa binbagandindini ti golliburiɲaŋaanon ŋa, na gollisiriɲaŋaanon tiiga. 15 Baawo Alla sagon ni axa na golli sirun ya dabari, ken ŋa axa na haqilanloxon tuwanbalaaxun muumundi. 16 Xa da du raga hooro, xa nan maxa axa hooraaxu ke ɲa xufa yi axa buroyen kanma, xa bire xoyi Alla xidimaano. 17 Xa da seren su daro, axa na axa waaxinun xanu, nan kanu Alla yi, na tunkanyugun daro.
[Misaale isagankon da]
18 Komo, axa na dumaxayanqa axa kamannu da ti kanuyi xooren ŋa. Kamanyugu ku be sirun ga ni, nooxun ga ni, xa maxa dumaxayanqa kun baane danŋa de, aayi, hari ku be ɲanŋun ga ni, xa da dumaxayanqa i da. 19 Baawo axa ga ma xawa toora be muɲini, axa ga da ken muɲi ti Alla ya yi, ken ni neeman ya. 20 Axa gaa guman muɲini axa yangonun ya saabu da, kan yinmarawutte na axa da ken ŋa ? Xa axa gaa fiisiriɲaŋini, axa ga yille tooran muɲini, ken ni neeman ya yi Alla jon ŋa. 21 Ke yinme ya ni axa xiriyinmen ŋa, baawo Sugandiyenmen yinme xa yanganxate axa danŋa ya, a da misaalen toxo axa maxa, kuudo axa na sukke do i taabattun ŋa :
22 « Aken ma yango dabari,
nanbarantandigaame ma bogu a raqen ŋa abada.* »
23 Seron wa a kaana, xa a nta kayinde saaga sere yi. Seron wa a toorono, xa a nta sere su baxa-baxana. Ganta, a na i fin toqo kiitaana teleŋonten ya maxa. 24 Sallibinsollen kanma, aken ya n da o yangonun tiŋa i faten ŋa, kuudo o na ɲa furu yi yangon killen ŋa, xa o na bire teleŋontaaxun da. Axa jaare ti aken ya joogiraqun ŋa. 25 Tonŋu, axa ɲi xo jaxanlen sankunto ya, xa saasa, axa saage katta axa nagaanan ŋa, axa yonkinun koroosindaana.