[Yaxanlenmon filli meedaronde]
3
Ayiwa yaxarin yaxinto, axa xa na ken moxo ya yi, xa da axa du maxayanqa axa kiinanu da. Ken moxo, hari yaxare be kiina ga nta toŋondini ti Alla digaamen ŋa, axakun duuragemoxon na a duŋandi, na a ɲi sefe fe, 2 baawo i yaaxen wa axa duuragemoxo sennen do daroyen ŋa. 3 Axa ɲaagaaren nan maxa ɲa beradunfo yi : xo yinten tulundu, kanɲaagaaru, ken do yiran kallanŋunto. 4 Xa, a nan ɲa sondomen ɲaagaari muxunten ya, sondon nooxe, sondon deejante. Ken ya ni ɲaagaaren ŋa, a ga nta bonno, a jonkon ga n xoora Alla maxa. 5 Gannin xase, yaxarin sennu be ga ɲi i jikken saqa Alla kanma, i ɲi du ɲaagaarini ke moxo ya, i duumaxayanqanton ɲi i kiinanu da. 6 Misaale : Saaratu da du maxayanqa Ibirahiima da, ma a gaa a xilli ti : « N kamanyugo ». Axa ga na fo siren dabari, xaaxantaaxu fo wo fo ga ma axa hawuja, axa ɲa Saaratu ren yaxaru yi.7 Yugu, axa xa ni kundun ya. Axa do axa yaqun gaa doome, xa da axa kiilun toxo i ya nan ti lanpunton ya ni. Xa da i daro, baawo axa do i su ni xeyimaxanlenmon ya yi bireyen neeman ŋa. Xa da ken dabari, kuudo axa allanɲaageyun nan maxa ro xarun ŋa.
[Fiisiriɲanŋe]
8 Ayiwa, digaamen lagare, axa su nan ɲa sinmeyi baane, axa nan gemu xanne, na me xanu xo waaxinu, nan hinne me yi, a do maxayanqaye. 9 Axa n maxa buroye tuga ti buroye yi, axa n maxa kayinde tuga ti kayinde yi. Xa du nan duwa a kaman da ya, baawo Alla da axa xiri ti ken ya yi, kuudo axa na duwaawun xeye. 10 Baawo, a safe Jabuurin ŋa nan ti :
« Sere be gaa ŋaliyi siren mulla,
nan sewo i biton noxon ŋa,
a kaman na i neenen tanga bakka fo bure su yi,
na du koroosi nanbarantandigaamun ŋa.
11 A na i falle koyi fi buren ŋa, na fi siren ɲa,
a na xeerin muuru, nan bati do a yi.
12 Baawo Kamanen yaaxen na teleŋonton ya yi.
A taron tugunten wa katta i ɲaagexannun ŋa.
Xa Kamanen fallakoyinten ya ni fiiburiɲaŋaanon ŋa.* »
13 Axa ga na fiisiriɲanŋen yaxi, ko na fo bure ɲaana axa yi ? 14 Hari tooran ga na axa kita do fiisiriɲanŋen ya yi, wulluliŋontaaxun wa axa da. Xa maxa kanu i ya, xa maxa hawuje. 15 Xa, xa da Sugandiyenmen raga Kamane yi axa sondomun ŋa. Xa moxosironton nan ɲi bire su na jaabu sire kini ku be gaa axa tirindini axa jikken gaa ke be kanma. 16 Xa, xa da ken do nooxaaxun do daroyen ya dabari, axa haqilun taaxunto. Ken ŋa, sero be gaa axa botoburunu na axa ka ti axa duuragemoxo siren ŋa isagankaaxun noxo, i na yaagu. 17 Baawo nan toore do fiisiriɲanŋen batte, selli ken ga ni Alla sagon ya, ken xooni ya n fasu nan toore do fiiburiɲanŋen ŋa.
18 Na a tuguti, Sugandiyenmen yinme xa toore nan kara yangon da ta tinmanta baane ya, teleŋonten kara teleŋontanbalinun da, kuudo na axa geesu katta Alla yi. I da a kari haadamarentaben ŋa, xa a bire yonkigankantaben ŋa. 19 Ken yonkigankaaxu noxon ŋa, a daga hari yonki kasorankon waaju, 20 kun ya n da Alla kuta ganni na a ɲi Alla muɲi i da annabi Nuuha jiidunfuuren tagebiren ŋa, sere lamaanu ga kisi jin ŋa, sero segi. 21 Ayiwa saasa, ken ni tuubiyinwanqiye ke ya taagumanse yi axa xa danŋa na axa kisi. Ken wanqiye nta do fate laabande yi de, xa a na koyini ya nan ti o wakkile sukkene do Alla yi ti sondon xalasinte yi ti Isa Alimasiiwu wundiyen ŋa. 22 Aken Isa ya n sege kanmun ŋa nan taaxu Alla tayen ŋa. Alla da maliikannun do fankanun do senbun su maxayanqa Isa da.