[Toŋondinton biremoxo]
4
Ken kuŋa, Sugandiyenmen suufun ga toore ya, axa xa na axa gajanyokkun wutu ti ken sinmeyi baane yi, baawo sere be suufun ga toore, an do yangon fate, 2 kuudo waxati ke be ga toxo axa maxa axa suufun ŋa, axa nan maxa a bira yonkiliŋun noxon ŋa keeta, xa, axa na a bira Alla sagon ya noxon ŋa. 3 Baawo ganni, axa da wucu laate ɲa axa gaa birene do allankannanbalinun liŋun ŋa, na du kini fiinu be gaa xo : jeeniyihaqidanginte, yonkiliŋu, mandeyimoxoburaaxu, fesexiye, minnanxooraaxu, a do munumexentabatte. 4 Saasa, axa ga ntaxa wurunu do i ya do kun fiiburiɲaŋiyi haqidanginto yi, ken ɲaana i da fi mukke ya yi, i na saage axa kaana. 5 Xa i yinmenu na ri i ɲangollun dantaxi Alla jon ŋa, aken be moxosironten ga ni ti furun do ŋalinton kiitinden ŋa. 6 Ken ya saabu da, hari ku beenu ga kara saasa, Xibaari Liŋen ga gangi i da, kuudo hari i ga kiiti xo haadamarenmun su moxo, i na bire ti Fanka Sennen ŋa xoyi moxo be ga n liŋi Alla yinme da.[Kafon bireye]
7 Fon su lagarun tinko. Ken kuŋa, axa ɲa haqilanto, na axa kiilun toxo axa yinmenu yi, kuudo axa na katu allanɲaagene. 8 Ke be gaa fo wo fo kaane, ken ni axa na me xanu moxo siri ya, baawo :
« Xanuyen wa yangonun gabe xufaarini.* »
9 Xa da me bisimilla moxosiri, xa maxa fido me wure. 10 Alla ga da neema be ɲa be su da, xa da me deema ti ken ŋa, xo Alla sikkaano be ga da i kiilun toxo Alla neeman danben su yi. 11 Sere be ga na ɲi waajundini, a nan sefe ti Alla sefon ŋa. Sere be gaa deemandini, deemandi ti Alla ga da senbe be kini an ŋa. Ken moxo, daroyen na saage katta Alla yi fon su yi ti Isa Alimasiiwu horoman ŋa. Nooron do senbe wa a da ma abada. Anmiina !
[Biremoxo tooran noxo]
12 N maaren liŋu, toora ke be gaa axa kanma xo yinbinkuma a gaa axa jaarabini, a ma xawa axa juunu xo fi mukke ya ni. 13 Tooran gaa axa kanma moxo ke be yi do Sugandiyenmen batten ŋa, xa sewo kundun du ya yi, kuudo a nooron ga na bange koota be, axa na ɲaxali nan sewo siri. 14 Selli i gaa axa kaana do Sugandiyenmen ŋa, wulluliŋontaaxun wa axa da, baawo Yonki nooronten ya na axa kanma, Alla Yonki. 15 Xa, axa du baananbe nan maxa toore ti serikalle, ma fayiye, ma golliburiɲanŋe, walla ti wandifi yi. 16 Xa i ga na axa tooro ti baawo Isagankon ya ni axa yi, xa maxa yaagu ti ken ŋa, xa du nan xawa Alla tiigana ya ke toxo ga saxu axa yi. 17 Tonŋu, saasa yinme ya ni kiiten biren ga kiɲe, a jopene ti Alla kan ya yi. Ayiwa a ga jope ti oku ya yi, ku be ga bara Alla Xibaari Liŋen ŋa, kun lagarun ɲaana kan moxo ? 18 Safandi sennun xa ti :
« Teleŋonton kisiyen xoten ya ga ni,
garamajigun do yangoburugumun kun ɲaana kan moxo* ? »
19 Ken kuŋa, ku be ga toore do Alla liŋun ŋa, i na i yonkin xaliifa Tagandaana duntenŋen ŋa, nan sukke do fiisiriɲanŋen ŋa.