[Toŋonde katta isanjaman do i xirisun ŋa]
5
Xirisu be gaa axa noxon ŋa, n xa ni xirisen ya yi xoyi i moxo, n seede Sugandiyenmen tooran ŋa, nooro ke be gaa riini bange, taqe wa in xa danŋa a yi. N wa a muurunu axa maxa kuŋa nan ti : 2 Alla nagaanifoonu ku be xaliifanton gaa axa yi, xa da i koroosi, axa na axa kiilun toxo i ya. Neqinde kanma fe de, xa, a n giri axa yinme ya yi, xo moxo be gaa gemme Alla yi. Xa maxa ken dabari ti nata yi de, xa da a dabari ti ŋanniyi siren ya yi. 3 Alla ga da ku be xaliifa axa yi, xa maxa i mara ti kanda xote, xa, axa ɲa nagaanifoonu ku da misaale ya yi. 4 Ken moxo, Nagaananyinmanken ga na bange koota be, axa na toori dare kita, toore ke be ga nta xasoono.5 Ken moxo baane ya ni, fonnanxayu, axa xa na du maxayanqa xirisun da. Axa su na nooxaaxun doroken rondi kapen danŋa, baawo a safe Safandi Sennun ŋa nan ti :
« Alla wa dundaren gajanŋa,
xa a na nooxen ken neemana ya*. »
6 Ken kuŋa, xa da dumaxayanqa Alla kitti senbenten wure, kuudo waxati rakutunten ga na kiɲe, a na axa wurugi. 7 Xa da axa hanminun su sedi a kanma, baawo a xatene axa yi ya.
8 Xa sobi ! Xa da axa kiilun toxo axa yinme yi ! Axa xonne ke, Ibiliisa, a do yoorinden wa me yi do axa kaaron ŋa xo jarinta dullunten gaa guurunbene moxo be, a gaa sere muurunu na a kanbu. 9 Xa da axa tan tonto Ibiliisa kaane, axa sabatinton nan toxo danqanaaxun noxon ŋa. A nan ɲaŋi axa tuwaaxun nan ti ke toora me ya na axa waaxinun kanma duna noxon su yi. 10 Xa neeman su Alla, ke be ga da axa xiri katta i nooro duumanten ŋa ti Isa Alimasiiwu yi, axa toore falle waxati lamaane yi, a yinme ya na axa tinmandini, na axa xotondi na axa senbendi, fo wo fo ra ga nta axa dinbana. 11 Senben na Alla ya da ma abada. Anmiina !
[Kuuɲindi lagaru]
12 N da ke bataaxi depe safa katta axa yi ti Siliwaano deemanden ya yi, a gaa in maxa xo waaxi duntenŋe. N safandi katta axa yi ya kuudo in na duuruxotoye kini axa yi nan seede nan ti Alla neema haxiixan ya ni. Ken kuŋa, xa toxo a kanma ! 13 Isanjama ke be gaa Baabila yi, a ga sugandi xo axa moxo, i wa axa kuuɲini. N renme Maarika xa wa axa kuuɲini. 14 Xa da kuuɲinden sanqi axa do me naxan ŋa ti meexandunsunbunden ŋa.
Axakun be gaa Sugandiyenmen kapanlenmaaxun ŋa, xeerin gan na ɲa axa su kanma.