[Kuuɲinde]
1
Ke bataaxe wa gilli inke Simoona Piyeeri yi, Isa Alimasiiwu kome do a faare ga ni in ŋa. A wa katta sero yi, o danqanaaxun do ku be danqanaaxun gaa xiima baane yi, o da ke danqanaaxu kita ti Isa Alimasiiwu teleŋontaaxun ya yi, o Alla do o kisindaana. 2 Neeman do xeerin gan na guuji axa kanma ti Alla do o kaman Isa tuyiyen ŋa.[Toŋondinton xiriyinme]
3 O haajun gaa fo wo fo yi kuudo nan bire muuminaaxun noxo, a allaaxun senben ya n da a su kini o yi ti seren tuwaaxun ŋa, ke be ga da o xiri ti i yinme nooron do i siroyen ŋa. 4 Alla da fi xoora kallanŋunton laayidun wutu o da, na i kini o yi ti kun fiinu ya yi. Ken ŋa, yonkiliŋun ga da duna kanda ti bonontaaxu be yi, axa na katu dugutana a yi, na taqe kita allaaxun ŋa.
5 Ken yinme ya saabu da, axa ga n xawa axa duuruxotono na siroyen kafu axa danqanaaxun ŋa, na tuwaaxun kafu siroyen ŋa, 6 na duugoyimanden kafu tuwaaxun ŋa, na muɲiyen xa kafu duugoyimanden ŋa, na muuminaaxun kafu muɲiyen ŋa, 7 na sunpuransiraaxun kafu muuminaaxun ŋa, na xanuyen kafu sunpuransiraaxun ŋa. 8 Ku fiinu ga na me ɲi nan tallan gabo axa maxa, i na ɲa sababu yi axa na du dinba, nan katu o kaman Isa Alimasiiwu tallan tuunu. 9 Xa, ku fiinu gaa sere su kumana, ken kaman nta noqu laate walla, a na xo finkinten ya, Alla ga da a senondi bakka i yango xason ŋa, a ga mungu do ken ŋa.
10 Ken kuŋa in maarenmu, xa duuruxoto, Alla ga da axa xiri na axa sugandi, xa tigiti ken ŋa moxo siri, ken ŋa axa nta xenne abada. 11 Ke moxo ya ni axa yinmarawutunton gaa roono o kaman Isa Alimasiiwu abadantunkaaxun noxon ŋa, o kisindaana.
12 Ken ya saabu da, n gaa axa haqilun yanqandini ku fiinu yi bire su, hari axa gaa i tu do i moxo su, axa tokkinton xa gaa do tonŋu ke be ga koyi axa yi. 13 Xa inke sinmeye, na in yonkin toxo in faten ŋa xo kuunaare, n nan xawa na axa haqilun wundu ti in sinmandindun ŋa ya. 14 Baawo in wa a tu nan ti a ntaxa dallana in wa bakka ke kuunaare yi, xo o kaman Isa Alimasiiwu ga da a tuyindi in ŋa moxo be. 15 Xa in wa in duuruxotoyen su dabarini, hari in dagayen falle, axa ra gaa sinmene do ku xaranŋundu yi bire su.
[Alimasiiwu darontaaxu]
16 O ma o kaman Isa Alimasiiwu riyi senbenten tuyindi axa yi ti gaarantanxiisanu tuwaaxu yi, xa o da a darontaaxun wari ti o yaaxen ya yi. 17 Tonŋu, a da darontaaxun do nooron kita Baaba Alla maxa, koota be a ga da du toxo i nooro dawulanten noxon ŋa nan ti a da : « Ke ya ni in Ren xana ke yi, n sewonten da a ya sugandi.* » 18 Alla ken sefexanne ga giri kanmun ŋa, oku yinme ya n da a mugu ti o tarun ŋa, ken bire o do Isa su wa gidi sennen kanma.
19 Ayiwa o saxuntaxooron gaa annabinyinmu ku sefon be yi, i gaa o maxa, axa kiilun gaa i ya, axa wa a kanma na fo sire ɲa ken ŋa. Baawo i na xo lanpan ya, a gaa ɲelunqene biten ŋa ma yillankaro, suxubansaanen gaa bakka na axa sondomun xurandi. 20 Nafan gaa ke be tuwaaxun ŋa axa da siri, ken ni : allanxibaarinde su nta Safandi Sennun noxon ŋa, sere ra gaa a fasarini ti i durantuwaaxun ŋa. 21 Tonŋun ga ni ke be, allanxibaarinde su ma ɲaŋi ti haadamarenme liŋu yi, xa i sefe Alla toxon ya yi ti Fanka Sennen ɲonqinden ŋa.