Yohanna bataaxi fana
Yohanna bataaxun roraqe
Bataaxu sikki wa Laayidu Kurunba noxon ŋa, a tuyinten ga ni nan ti Yohanna ya bataaxi safanto ni. Safandaana su toxon nta bataaxi fana ke yi. Bataaxi fillande do sikkande safandaanan ya n da du xiri : « Xirise ». Sere ke be ga safandi katta ku sero yi, a n dara i maxa moxo siri.
Ganninkon maxa, Yohanna yinme ya n da ku bataaxun sikki safa, Isa Alimasiiwu faarun tanmi do fillon du baananbe ya ni. A ɲi kapa a kapalen tinku ku xa ya yi. I ga da Isa genge do sallibinsollen ŋa koota be, a da i ma Mariyaamu xaliifa ken Yohanna ya yi.
Bataaxi fana ke ga xayi katta sere be yi, a kaman ma tuyi. « Alla ga da yaxare ke be sugandi », bataaxi fillande ke xayi katta a do i renmu ya yi. Yere, a ga ti : « yaxare ke do i renmu », seron yogonu sinmaye, a na do Isanjama yogo ya yi. Bataaxi sikkande ke xayi katta Isanxaranlenma yogo ya yi, a toxon ga ni Gaayi. Ken Gaayi kafiini Isanjama yogo ya yi, manqanŋen gaa Isanxaranlenmon naxan ŋa non ŋa.
Isa Alimasiiwu xibaaren dalla nan ri i ya. Xa wucen ga laato, xibaare ke faamimoxon da, manqanŋen ro Isanxaranlenmon naxan ŋa. Sero yogo bogu i jaman ŋa yinme nan daga. Yogonu xa wa xotoyen tallan roono jaman ŋa. Nan ti Isa ni Alla yinme ya yi, a ga ɲa fataganke yi, i ma duŋe ti ken ŋa. Ken kuŋa, i haaju nta Isa yi, maana su nta a kallen do a bireyen ŋa i maxa. I sefen ya ni : « Junuubu nta oku yi, o wa Alla tu, o na xurayen ya yi. » Xa ken nta wariini i biremoxon ŋa.
Yohanna da a muuru Isanjaman maxa, i nan maxa sukke do ku gaarantan sinmayu be ga koniini Isa do Alla kanma. Allanlenmun saxunten ya na a yi nan ti Isa ni Alla yinme ya yi, a ga ɲa fataganke yi. Sero be gaa fo tana koono ken ga fe, alimasiiwunxonnon ya ni. Toŋondinton tokkinten nan xawa toqo i ga da ke be mugu gelli joŋaarun ŋa ya. Ku bataaxu wa a xurandini nan ti : na Alla do Isa xanu, ken ni na an menfunen ya xanu. Isanxaranlenmon biremoxon do i danqanaaxun nan xawa me wuttu ya.