[Kamanen riye]
3
N maaren liŋu, ke ni in bataaxi fillandin ya yi in gaa a safana katta axa yi. Bataaxu ku filli su noxo, n na muurunu na axa haqilun wundu katta sinmeyi xalasinto ya yi ti in sinmandindun ŋa. 2 Annabinyin sugandinton ga da sefo be ko gannin xase, xa sinme do kun ŋa, nan sinme do o kaman do kisindaanan ɲaamarindixannun ŋa axa faarun ga da i kiɲandi axa yi. 3 Axa n xawa a faamunu ya finanu nan ti kiyi lagarun ŋa, soyaano wa riini soyi. Kun ni sero ya, i gaa sukkene do i yinmenu yonkiliŋun ŋa. 4 I wa soyini nan ti : « Isa riyen laayidun na kan moxo ? O kisimanu kun kara, xa fin su na i moxon yi harisa gelli duna nan tage ! » 5 Xa ku sero da du mungundi do fo baane ya yi, ken ga ni : gelli ganni, kanmun sabatinten na ti Alla daalen ya yi, ɲiiɲen xa tage bakka jin ya yi ti jin ŋa. 6 Alla da dunafanan buruxa ti ŋaamen ŋa kundun ya. 7 Ayiwa ke kanmu do ke ɲiiɲe be axa yaaxen gaa i ya lenki, ken daale ya n da i tigiti yinben da, i taaxini ya ma kiiten koota Alla gaa allankannanbalinun bonondini.8 N maaren liŋu, xa maxa mungu do fo baane yi : Kamanen maxa, koota baane na xo wujuune siine ya, wujuune siine na xo koota baane ya.* 9 Kamanen nta leelene i laayidun tinmanden ŋa, xo a gaa yogonu da a leele ya, aayi, a muɲini axa danŋa ya, a nta mulla sere su gaa halakini, a du na a mulla seren su na du rasaaga ya. 10 Ganta, Kamanen riikootan juyintanriini ya xo fayaana. Ken koota, kanmun na buruxe direyi xooren noxon ŋa, saanun na buruxe ti yinben ŋa, ɲiiɲen do gollu su gaa ɲiiɲen kanma, i na sanku.
11 Ayiwa ke su ga n xawa sankunu ke moxo ya yi, axa senontaaxun do axa muuminaaxu nan xawa ɲaana kan moxo xa yi sa 12 na Alla kootan riyen dugu, na a riyen jawondi ? Ken koota ga na ri, yinben ya na kanmun buyini lewu, fo su gaa kanmun ŋa, a na xaje. 13 Xa, Alla ga da laayidun wutu nan ti kanmu kurunban do ɲiiɲa kurunban wa riini, oku na ken ya dukku, teleŋontaaxun kan na non ya yi.
[Duuruxotoye]
14 Ken ya ni in maaren liŋu, ken dugunde noxon ŋa, xa da axa duuruxoto, a na axa ɲi xeerin noxon ŋa, loojuru do jalagindira ga nta axa yi. 15 Xa da a jaate nan ti Kamanen muɲiyen ni axa kisiyen ya. Pawulu, o waaxi liŋe, a xa da ken ya safa i bataaxun noxon ŋa ti Alla ga da fontuwaaxu be kini a yi. 16 A sefe ku fiinu kanma, xo a ga demu a koono i bataaxun su noxon ŋa moxo be. Noqunun wa a bataaxu ku yi, i faamuyen xoten ga ni. Xaranbalinu, a do sero beenu danqanaaxun ga ma sabati, i na kun noqunu ya maanan ɲengendini. I na safandi sennu tananu xa maanan ɲengendini kundun ya yi na i du halaki.
17 Xa axakun kun in maaren liŋu, n da axa gongo, axa na du koroosi axa nan maxa du wara do garamajigun sankuntaaxun ŋa, axa siga sabatinten nan maxa daga duguta axa yi. 18 Xa, xa duuruxoto axa nan daga kaane ti o kaman do o kisindaana Isa Alimasiiwu neeman do a tuwaaxun ŋa. Nooron wa a da gelli saasa ma abada. Anmiina.