[Gaarantanxaranŋundu]
2
Ayiwa du-annabinyinmun ɲi kapa Banisirayila jaman ŋa, du-xaranmoxonun riini bange axa xa noxon ŋa kundun ya. I wa bonondindigaaron xaranŋundini seron ŋa do muqen ŋa. Kamane ke be ga da ikun yinme maxawasa, i wa hari ken yinme nakkarini, na halakiyen juyintanxenundi i du kanma. 2 Seren gaben wa sukkene do i jeeniyihaqidanginten ŋa, i ken moxo ya n ɲaana tonŋun killen bexunden ŋa. 3 Naaburunxannaaxu saabu da, i na i neenun liŋondi nan bire axa yi. I yanganxatan dalla ta yi, a nta tuumana, i bonen nta xenqene.4 Alla ga ma yanganxatan toxo maliikan yangoburugumun da,* xa a ga da i fitta Jahannaba kun jupen ya yi, i xarunton gaa bitanbinnen noxon ŋa, na i tigiti kiiten koota da ; 5 a ga ma yanganxatan toxo dunafanan seron da, a ga da garamajigun halaki ti tuufaana ŋaamen ya yi, xa a ga da sero ɲeri kisi kafiini annabi Nuuha yi, seri segunde, teleŋontaaxun gangundaana* ; 6 a ga da Sodoomu do Hamoora raga ti halakiyen ŋa, na i ɲa xamen ŋa, kuudo i na ɲa garamajigun da gongonde yi ti ke be gaa i dukku* ; 7 xa a ga da Luuti kisi, teleŋonte ke, garamajigun jeeniyihaqidanginten ga da a butten xaasa 8 (baawo ke seri teleŋonte ɲi birene i noxon ya yi, a buttunxaasanten ya ni i teleŋontaaxu ke noxon ŋa koota su ti allankuteyingollu ku be a yaaxen do a taron gaa i yi), 9 ke su wa a koyini kuŋa nan ti Kamanen wa a tu i gaa muumininun kisini jaaraben ŋa moxo be, na teleŋontanbalinun taaxundi yanganxatan danŋa kiiten koota, 10 sakkati ku beenu gaa wurunu do yonkiliŋu sobinten batten ŋa, i gaa tunkaaxunun xa su bexe-beqe.
Ku gaarantanxaranmoxonu kundu saxunton wa i yinmenu yi siri. I n dara i du maxa, i nta kanna hari kanmun tagefo darun xajafini. 11 Na a ɲi xa de, maliikannun be ga n fuŋu ikun ŋa fanka do senbe, i nta kun tagefo daru xajafini na i kiiti Kamanen jon ŋa. 12 Xa ku sero kundu na xo daaba xawuyun ya, i gaa i daabantaben ŋa, i nan xawa tongiini ya nan kara. I na fon ya xajafini, i ga nta ke be tu, ayiwa i halakini ya nan moti xo daaba. 13 Alla wa riini i fo buren tuga ti fo buren ŋa. Ku sero na du kinni yonkiliŋun ŋa kiiranxullen ya, na i faton daxanmu. I wa walaxini axa yi na kafonyigandun sobindi na i ɲexundi axa maxa, na axa janba. 14 Jeeniyen ya na i yaaxon fakka, i nta fakka yango yi. Sero be ga ma sabati, i na kun ya jaarabini. Sero ya ni, i ga da du demundi naaburunnatan ŋa, langerenmun ya ni. 15 I da killi teleŋonten wara nan sanku, nan sukke do Booro renme Balaamu taabattun ya yi, a ga da du wutu do golliburuɲaŋintugaadin xanuyen ŋa. 16 Xa Balaamu ga da ke kutegolle dabari, fariyaxaren ya n seransefe a da, fonmuume, na annabinyinmen kuralli ti i haqilanloxongollen ŋa.*
17 Ayiwa ku gaarantanxaranmoxonu na xo terin ya, a ga nta toyini ; i na xo newun ya, a gaa telle do fanken ŋa. Sero ya ni, Alla ga da taaxuran gemundi i da bitanbinni jupen noxon ŋa. 18 Tonŋu, i na digan xooron ya koono, digan duuru. Sero be gaa finna booxene bakka sankunton ŋa, i na kun ya ragana ti i faten daxanmen ŋa ti jeeniyihaqidanginten ŋa. 19 I na ti i wa i bakka komaaxun ŋa na i hooro. Na a ɲi ikun yinmenu na bonontaaxun komaaxun ya noxon ŋa, baawo fo wo fo gaa yonkin niini, a ɲaana ken fo da kome ya. 20 Sero ku be ga katu du bakka duna fi ɲexunton maxa ti o kaman do o kisindaana Isa Alimasiiwu tuyiyen ŋa, ken falle i ga da du wara, kun fi ɲexunto ga saaga i niini, i moxo lagaren bono nan xoto i joŋamoxon ŋa. 21 Baawo hari i gan maxa teleŋontaaxun killen tu abada, ken ya n fasu i da diinanta i ga da a tu ken falle nan fallakoyi ɲaamarindixan sennu ku be i ga da i kiɲandi i ya. 22 Ke taali sahante ya n rage i ya, ken ga ni :
« Wullen saage katta i yinmen goqen ŋa,* »
ken do :
« Faringijen ga wanqi nan xura, a saage telle bilinqe botoxan ŋa. »