Yohanna bataaxi fillandi
1
Ke bataaxe giri nke ya yi,
Xirise ke,
Alla ga da yaxare ke be sugandi,
bataaxe ke na katta ken ya do i renmun ŋa.
N da axa xanu xanuye su xenpa.
N baane ma axa xanu de,
n do fo wo fo gaa tonŋun tu ya n da axa xanu,
2 baawo tonŋun sabatinten wa o sondomun ŋa,
a toqo a yi ya xa ma abada.
3 Baaba Alla do Isa Alimasiiwu,
Baaba Renme ke,
i gan na neeman do hinneyen do xeerin kini o yi ti tonŋun do xanuyen ŋa.
4 N ga da an renmu yogonu ɲi tonŋun killen kanma,
xoyi Baaba ga da o ɲaamari moxo be,
ken da in sewondi moxo siri.
5 Saasa,
n maaren yaxare,
n gaa fi be muurunu an maxa,
a faayi :
o na me xanu.
N nta ɲaamarindixan kurunba safana katta an ŋa.
Ke ɲaamarinde ya n ɲi o maxa gelli joŋaaru.
6 Xanuyen ga ni ke be,
a faayi :
O nan bire xoyi Alla ga da o ɲaamari ti a yi moxo be.
Ke ɲaamarinde,
o n xawa bireene a ya noxon ŋa,
xoyi axa ga da a mugu moxo be gelli joŋaarun ŋa.
7 Gaaranten gabo do duna noxon ŋa.
I ma duŋe nan ti Isa Alimasiiwu ɲa fataganken ya yi.
Kun ya ni gaaranto ku yi,
i ya ni alimasiiwunxonnon ŋa.
8 Xa da du koroosi,
axa nan maxa kume axa gollen muson ŋa,
xa,
axa na axa gollen muson tinmanten kita.
9 Sere wo sere ga ma tokki Alimasiiwu xaranŋunden baane yi,
an ga da fo tana ya kafu a yi,
an tokkinten nta Alla yi.
Sere be ga na tigiti ke xaranŋunde,
an tokkinten wa Baaba yi,
an tokkinten wa Renmen xa yi.
10 Sere wo sere ga na ri katta axa yi,
ke xaranŋunde ga nta a kaman maxa,
xa maxa a bisimilla an kan ŋa.
Maxa a maarenkuuɲi.
11 Sere be ga na a bisimilla,
an do a su baano golliburuɲanŋe yi.
12 Sefe gabe ya na in maxa in ga n xawa i walla katta axa yi.
Xa in nta a mulla na i kiɲandi axa yi ti safadare do dawa yi.
A wa in kiilen ŋa nan daga axa sagata,
do axa nan sefe yaaxe ti yaaxe.
Ken ŋa,
o ɲaxaliyen na tinme.
13 Alla ga da an maaren yaxare ke be sugandi,
a renmun wa an kuuɲini.