[Seedeye ti Isa yi]
5
Sere be ga toŋondi nan ti Isa ya ni Kisindaana ke yi,
Alla da ken kaman renmaaxu.
Sere wo sere ga da faabe xanu,
an da a renmen xa xanu.
2 O na a tuunu kan moxo nan ti o da allanlenmun xanu ?
Ken ni ya o ga da Alla xanu,
na a ɲaamarindixannun daro.
3 Na Alla xanu,
ken ni na a ɲaamarindixannun ya daro,
hari fo xote fe.
4 Alla ga da sere wo sere renmaaxu,
an da duna ni.
Fi be gaa o ɲaana niyindaano,
ken ni o danqanaaxun ya yi.
5 Ken kuŋa,
duna niyindaanan ni ko yi ?
Ken ni ke be ga saxu a yi nan ti Isa ni Allanlenmen ya yi.
6 Isa Alimasiiwu,
a ya n bange ti jin do foren ŋa.
A ma bange ti jin baane yi de,
aayi,
a bange ti jin do foren ya yi.
Ayiwa,
Alla Fanka Sennen wa seedene a da ti ken ŋa,
baawo Fanka Sennen ni tonŋun ya yi.
7 Seedaano sikki wa a yi,
kun ga ni :
8 Alla Fanka Senne,
ji,
a do fore.
I sikki xa su gemu xanne yi.
9 O saxunton wa seron seedaaxun ŋa,
xa Alla seedaaxun ya n xoora a yi.
Alla ga seede i Renmen da ti ke be yi,
ken ya ni seedaaxun ŋa.
10 Sere be ga na toŋondi ti Allanlenmen ŋa,
ke seedaaxu wa an sondomen ŋa.
Xa sere be ga ma toŋondi ti Alla yi,
an da Alla raga gaarante yi,
an ma toŋondi ti Alla ga seede i Renmen da ti ke be yi.
11 Seedeye ke faayi :
Alla da bireyi duumanten kini o yi,
ken bireyi duumante na a Renme ke ya yi.
12 Allanlenme ke gaa sere be maxa,
bireyen wa an maxa.
Allanlenme ke ga nta sere be maxa,
bireye nta an maxa.
13 N da ke safa katta axa yi ya,
kuudo axa na a tu nan ti axakun beenu ga toŋondi ti Allanlenmen ŋa,
bireyi duumanten wa axa maxa.
14 Fi be gaa a koyini nan ti o buttun xoton wa Alla kanma,
ken ni ya :
o muurifon ga na gemu a liŋun ŋa,
a gaa o terinkana.
15 O gaa a tu nan ti a wa o terinkana kuŋa,
o na a tu xa nan ti a wa o muurifon su ɲaana o da.
16 Sere be ga na i waaxin wari junuubun golle yi,
junuubu be ga nta a kiɲana kalle yi,
an na Alla ɲaaga a da,
Alla wa bireyen kinni an waaxi ke yi.
Ken ni junuubun gollun be ga nta a kiɲana kalle yi ya.
Xa junuubun wa a yi,
ke be gaa a kiɲana kallen ŋa,
n ma ti an na Alla ɲaaga ti ken ŋa.
17 Teleŋontanballaaxun su ni junuubun ya yi.
Xa,
junuubun su nta seren kiɲana kalle.
18 O wa a tu nan ti Alla ga da sero be renmaaxu,
kun ntaxa junuubu dabarini,
baawo Alla ga da ke be renmaaxu,
ken ya na kun tangana.
Ibiliisa ra ntaxa fo bure ɲaana kun ŋa.
19 O wa a tu nan ti Alla ya fo ni oku yi.
O wa a tu xa nan ti duna su na Ibiliisa ya kittun ŋa.
20 O wa a tu xa nan ti Allanlenmen ri haqile ya kini o yi,
o nan katu Alla jaatin tuunu.
Ken moxo,
o do Alla jaatin na kafi,
o do a Renme Isa Alimasiiwu na kafi.
Ken Renme yinme ni Alla jaatin ya yi,
bireyi duumanten ya ni.
21 N renmu,
xa da du koroosi,
axa n maxa alla tana batu.