[Duxayifaarun tuyiye]
4
N xana liŋu,
fo wo fo gaa riini katta axa yi nan ti Alla Ruuhun¤ wa ike yi,
axa maxa saxu ken su yi de.
Xa da i guuga siri selli ruuhu ke be gaa i ya,
a ga giri Alla yi,
baawo duxayifaarun gabun sanqi do duna su ya yi.
2 Axa gaa Alla Ruuhun tuunu moxo be,
a faayi :
ruuhu su ga seede nan ti Isa Alimasiiwu ɲa fataganke,
ken ya n giri Alla yi.
3 Xa ruuhu su ga ma seede ti ke Isa Alimasiiwu yi,
ken ma giri Alla yi.
Ken ni Alimasiiwunxonnen ruuhun ya yi.
Axa da a mugu nan ti Alimasiiwunxonnen ruuhun wa riini de.
Ayiwa,
ken ruuhu wa duna yi gelli waca.
4 Xa in renmu,
Alla ya fo ni axakun ŋa,
axa da duxayifaaru ku kaaɲa.
Baawo ke be gaa axa yi,
ken ya n xoora ke be gaa duna yi.
5 Ikun na duna ya foyaaxun ŋa,
ken ya saabu da i gaa sefene duna sefemoxon ŋa,
duna wa i terinkana xa.
6 Xa oku na Alla ya foyaaxun ŋa.
Sere be gaa Alla tu,
a wa o terinkana.
Sere be ga nta Alla foyaaxun ŋa,
a nta o terinkana.
O katta tonŋun ruuhun do gaaren ruuhun bakka me yi ke moxo ya yi.
7 N xana liŋu,
o na me xanu,
baawo xanuyen giri Alla ya yi.
Xanuyen gaa sere be yi,
Alla ya n da ken kaman renmaaxu,
a wa Alla tu.
8 Xanuye ga nta sere be yi,
ken kaman nta Alla tu,
baawo Alla ya ni xanuye.
9 Alla ga da i xanuyen koyi o yi moxo be,
a faayi :
a da i Renbajjon xayi katta duna yi kuudo o na bire ti a yi ya.
10 Fi be ga ni xanuye,
a faayi :
oku ma Alla xanu de,
a ya n da o xanu.
Ken ya ni a ga da i renmen xayi riini a nan ɲa o junuubunun yanpeyinsadaxan ŋa.
11 N xana liŋu,
Alla ga da o xanu kundu ya yi,
o xa nan xawa me xanna ya.
12 Sere su ma Alla wari,
xa o ga na me xanu su,
Alla wa ɲaana o yi,
a xanuyen su na tinme o naxan ŋa.
13 O gaa a tuunu moxo be nan ti Alla sabatinten wa o yi,
o xa sabatinton wa Alla yi,
a faayi :
a da i Fanka Sennen ya kini o yi.
14 O da a wari ti o yaaxon ŋa,
o wa seedene ti a yi nan ti :
Baaba da i Renmen xayi riini ti a nan ɲa duna kisindaanan ya yi.
15 Sere be ga seede nan ti Isa ni Allanlenmen ya yi,
Alla sabatinten wa a kaman ŋa,
a kaman xa sabatinten wa Alla yi.
16 Xanuye be gaa Alla maxa katta o yi,
oku da a tu,
o saxu a yi.
Alla ni xanuyen ya yi.
Sere be sabatinten gaa xanuyen noxon ŋa,
an sabatinten wa Alla yi,
Alla xa sabatinten wa an ŋa.
17 Ke be gaa koyini nan ti xanuyen tinmanten wa o yi,
ken ni ya :
kiiten koota,
o haqilun taaxunton ya ni.
Baawo,
Isa Alimasiiwu ga ɲi duna noxon ŋa moxo be,
o xa faayi duna noxon ŋa kundun ya yi.
18 Xaaxantaaxu su nta xanuyen noxon ŋa.
Ken kuŋa,
xanuyi tinmanten wa xaaxantaaxun xatana.
Baawo xaaxantaaxun tinken ni yanganxatan ya yi.
Xaaxantaaxun gaa sere be yi,
a kaman xanuyen ma tinme.
19 Oku be ga ni,
xanuyen wa o maxa,
baawo Alla fina ya n da o xanu.
20 A gaa sere be maxa ti i da Alla xanu,
xa xonnaaxun gaa an maxa katta an waaxin ŋa,
gaaranten ya ni an ŋa.
An waaxi ke be gaa an yaaxon ŋa,
an ga ma a xanu,
an yaaxen ga nta Alla ke be yi,
an ra nta a xa xanna.
21 Isa ken yinme da o ɲaamari ya nan ti :
« Sere be gaa Alla mulla,
a na i waaxin xa xanu.* »