1 Yohanna 3

[Allanlenmu]

Axa ma a wari ? Xanuyi xoore wa Baaba maxa katta o yi, ma a gaa o xilli « allanlenmu », ken xa ya ni o yi mene. Ken ya ni, duna ga ma o tu, baawo i nta Baaba tu. 2 N xana liŋu, allanlenmun ya ni o yi hari ke saasa, xa o gaa riini ɲa ke be yi, a ma bange fina. Ganta, o wa a tu nan ti Kisindaana ke ga na bange, o ɲaana xoyi a moxon ya yi, baawo o wa riini a moxon su wari. 3 Sere su ga da i jikken saxu Isa Alimasiiwu kanma kundu, an da du senondi, xo a yinme sennen ga ni moxo be.

4 Sere su gaa junuubungollen dabarini, an muruti nan bogu Alla sariyan ŋa, baawo junuubungollen ni murutiyen ya yi katta Alla sariyan ŋa. 5 Axa su na a tu xa nan ti Isa Alimasiiwu riyinmen ni na junuubun su ya wutu. Ayiwa, junuubu su nta aken yinme yi. 6 Ken moxo ya ni, sere su tokkinten ga toxo aken ŋa, a kanman ntaxa junuubu dabarini. Xa sere wo sere ya ga sukke do junuubun ŋa, ken wa a koyini ti ken kaman ma Alimasiiwu wari, a nta a tu xa.

7 N lemunu, axa maxa duŋe sere su gaa axa sankundini de ! Sere be ga na teleŋontaaxun gollun dabari, a kaman yinme teleŋonten ya ni xo Isa Alimasiiwu teleŋonten ga ni moxo be. 8 Sere be ga toxo do junuubunɲanŋen ŋa, ken kaman na Ibiliisa ya foyaaxun ŋa, baawo Ibiliisa da junuubun ya dabari gelli joŋaarun ŋa. Ken yinme ya saabu da, Allanlenmen ga ri na Ibiliisa kun gollun buruxa. 9 Alla ga da sere wo sere renmaaxu, ken kaman ntaxa junuubu dabarini, baawo Alla ŋalintaaxun ya hadarinten na a kaman ŋa. Alla ya na a faaba yi, a ra ntaxa junuubu dabarini. 10 Ke be gaa allanlenmun do ibiliisanlenmun bakka me yi, a faayi : Sere wo sere ga nta teleŋontaaxu dabarini, ma an ga nta an waaxin mulla, an nta Alla foyaaxun ŋa.

[Mexanuye]

11 Axa da ke ɲaamarindixanne ya mugu gelli fiinun joŋaaru nan ti : o na me xanu. 12 O nan maxa ɲa xo Xaabila moxo, a ɲi Ibiliisa ya foyaaxun ŋa, a da i waaxin kari. Manne n sigi Xaabila ga da i waaxin kari ? Seri buren ya ni aken ŋa, a waaxi ke ken xa ni seri siren ya yi.

13 N maarenmu, duna ga na axa xoni, ken nan maxa axa kaawafi. 14 Xanuyen wa oku do me naxa, ken ya ni o gaa a tu nan ti o giri kallen ya yi nan ro ŋaliyen ŋa. Xanuye ga nta sere be yi, a toqo fure ya yi. 15 Xonnaaxun gaa sere wo sere maxa katta i waaxin ŋa, serikallan ya ni. Axa su xa wa a tu nan ti bireyi duumanten nta serikalla da. 16 Ke be ga da xanuyen tuyindi o yi, a faayi : Isa Alimasiiwu da i yonki ya kuyi o danŋa, o xa moxosironton ya n xawa ɲiini o yonkinun kuyinden ŋa o waaxinun danŋa. 17 Biraadon gaben gaa sere be maxa, an yaaxen wa an waaxin ŋa biraadon hanmin ŋa, an na an kiilun xiti bakka a yi, ken kaman katta tini ike da Alla xanu kan moxo ? 18 N renmu, o xanuyen nan maxa ɲa sefen do moxotakonimoxo siren baane yi. O na xanuyen koyi ti ɲangollun ya yi. Kun gollu ya na a koyini ti o xanuyen ni tonŋun ya yi.

19 O na a tuunu ke moxo ya yi nan ti o na tonŋun ya foyaaxun ŋa. Kiilutaaxe xa be gaa o da Alla jon ŋa, ken ni ya : 20 hari o sondonsinmayun ga na o jalagi, Alla ya n xoora o sondonsinmayun ŋa, a wa fon su tu. 21 N xana liŋu, selli o sondomun ga ma o kiiti xa, o haqilun taaxunton ya ni Alla jon ŋa. 22 Ken kuŋa, o ga da fo wo fo muuru a yi, o wa a kitta, baawo o da a ɲaamarindixannun batu na a liŋun dabari. 23 A ga da o ɲaamari ti fi be yi, a faayi : o nan saxu i renmen ŋa, ken ga ni Isa yi, o na me xanu xo Alla ga da a ko moxo be. 24 Sere be ga na Alla ɲaamarindixannun batu, ken kaman tokkinten ya n toqo Alla yi. Alla xa do a kaman wa ɲaana fo baane yi. Fo be ga a tuyindini o yi nan ti Alla wa kafiini o yi, ken ni a ga da ke be kini o yi ya.