2
N renmu,
n da ke safa katta axa yi ya,
kuudo axa nan maxa junuubu ya ɲa.
Xa sere be ga na junuubungolle dabari,
Deemandaana wa o maxa Baaba jon ŋa,
ken ga ni Isa Alimasiiwu yi,
teleŋonte.
2 Aken ya n da du ɲa o junuubunun yanpeyinsadaxan ŋa,
o baane danŋa fe de,
o do duna muuman su ya ni.
[Ɲaamarindixan kurunba]
3 O ga na Alla ɲaamarindixannun batu,
o yinme wa a tuunu nan ti o wa a tu.
4 Sere be ga na ti :
« Nke wa Alla tu »,
xa an nta a ɲaamarindixannun batta,
gaaranten ya ni an ŋa,
an nta tonŋu kanma.
5 Xa sere be ga na tigiti Alla sefexannun ŋa,
a xanuyen tinme ken kaman ŋa yinme ya.
Ke moxo ya ni,
o gaa a tuunu nan ti o do Alla wa kapanlenmaaxun ŋa.
6 Sere be ga na ti ike tokkinten wa Alla yi,
a kaman nan xawa bireene xoyi Isa Alimasiiwu yinme ga bire moxo ke be ya yi.
7 N xana liŋu,
n gaa ke be safana katta axa yi kundu,
ɲaamarindixan kurunba fe,
ɲaamarindixan xasen ya ni,
a ga kini axa yi gelli fiinun joŋaarun ŋa,
axa da a mugu nan xaso.
8 Ken do i fi su,
ɲaamarindixan kurunban ya ni,
n gaa a safana katta axa yi,
a tonŋun ga bange Isa Alimasiiwu yi,
nan bange axa xa yi.
Baawo biten faayi telle,
xurayen haxiixan bange yinme.
9 Sere be ga na ti :
« Nke na xurayen ya yi »,
na a ɲi xa an wa an waaxin xonno,
an finna biten ya yi.
10 Sere ke be waaxin xanuyen ga a yi,
ken kaman ya sabatinten ni xurayen noxon ŋa.
Fo wo fo ra nta sikki ken kanma gaa sankunu.
11 Xa sere ke be gaa i waaxin xonno,
ken kaman na biten ya yi.
A kaman terene biten ya yi,
a nta i dagaran tu,
baawo biten da a yaaxon raga.
[Alla liŋun dabarinde]
12 Lemunu,
n faayi safandini katta axa yi ya,
baawo axa junuubunun xafari ti Isa Alimasiiwu toxon ŋa.
13 N faabanu,
n faayi safandini katta axa yi ya,
baawo ke be ga ɲi du yi gelli joŋaarun ŋa,
axa wa a tu.
Fonnanxayu,
n faayi safandini katta axa xa yi ya,
baawo axa da Ibiliisa fanqa.
14 Lemunu,
n safandi katta axa yi ya,
baawo axa wa Baaba tu.
N faabanu,
n safandi katta axa yi ya,
baawo ke be ga ɲi du yi gelli joŋaarun ŋa,
axa da a tu.
Fonnanxayu,
n safandi katta axa xa yi ya,
baawo fankan wa axa yi,
Alla digaamen sabatinten wa axa sondomun ŋa,
axa da Ibiliisa fanqa.
15 Xa maxa duna xanu,
a do fo wo fo gaa duna noxon ŋa.
Sere be ga na duna xanu,
Alla xanuyen nta a kaman sondomen ŋa.
16 Baawo ku fiinu ya na duna yi :
faten daxanlenmiye,
yaaxarangillaaxu,
duna kiteyun dukoyintaaxu,
kun xa feti Baaba Alla fiinu yi,
duna ya fiinu ni.
17 Duna nta duumene,
ku yonkiliŋuntafiinu xa nta duumene.
Xa sere ke be gaa Alla liŋun dabarini,
ken kaman toqo duumene ya ma abada.
[Alimasiiwunxonno]
18 N lemunu,
dunanlagaren kiɲe.
Axa da a mugu nan ti Alimasiiwunxonnen wa riini,
xa alimasiiwunxonno gabe wa yere hari saasa.
Ken ya ni o gaa a tuunu nan ti dunanlagaren kiɲe.
19 Alimasiiwunxonno ku booxe bakka o yi nan daga,
xa tonŋun ga ni ke be,
o waaxinu fe.
O waaxinu ga n ɲi,
i ɲi toqo o waaxaaxu ke ya yi.
Xa,
i booxe bakka o yi,
kuudo a na xura nan ti a su feti o kapanlenmo yi.
20 Xa,
axaku,
Isa Alimasiiwu¤ da Alla Fanka Sennen kini axa yi,
axa su wa tonŋun tu.
21 N nta safandini katta axa yi nan ti baawo axa nta tonŋun tu de,
ken fe lewu !
N safandi katta axa yi ya,
baawo axa wa tonŋun tu.
Axa wa a tu xa nan ti gaare fo wo fo nta tonŋun ŋa.
22 Isa ya ni Kisindaana ke yi,
ko ni gaaranten ŋa kuŋa,
a ga feti sere be ga da ken nakkari ga fe ?
Alimasiiwunxonnen faayi :
sere be ga da Baaba nakkari,
na Renmen nakkari.
23 Sere wo sere ga da Renmen nakkari,
Baaba xa nta a kaman maxa.
Sere wo sere ga duŋe ti Renmen ŋa,
Baaba xa wa a kaman maxa.
24 Ayiwa,
axakun ga da xibaare ke be mugu gelli a joŋaaru,
a nan sabati axa sondomun ŋa.
Axa ga da xibaare ke be mugu gelli joŋaarun ŋa,
ken ga na sabati axa sondomun ŋa,
axa xa wa sabatini Renmen do Baaba yi.
25 Alimasiiwu yinme ga da laayidu be wutu o da,
ken ni bireyi duumanten ya yi.
26 Ku be ga ɲi a mulla na axa sankundi,
n faayi ga da ke safa katta axa yi i ya xanne maxa.
27 Xa,
axaku,
Fanka Senne ke be Alimasiiwu ga da a sabatindi axa yi,
ken wa toxiini axa kanma,
axa haajun ntaxa sere su xaranŋunde yi.
Fanka Sennen ya na fon su xaranŋundini axa yi,
a gaa axa xaranŋundini fo wo fo yi,
tonŋun ya ni,
gaare fe.
Ken ya ni,
axa tokkinton nan toxo a yi xoyi a ga da a xaranŋundi axa yi moxo be.