Yohanna bataaxi fana
[Daali Ŋalinte]
1
Ke be ga ɲi du yi gelli joŋaaru,
o ga da ke be mugu,
o ga da ke be wari ti o yaaxon ŋa,
o ga da ke be duxura moxo siri,
o ga kati ke be yi ti o kittun ŋa,
ken ni Daali Ŋalinten ya yi.
2 Ken ŋaliye bange,
o da a wari xa.
O seede ti a yi xa,
o da bireyi duumanten xibaaren kiɲandi axa yi.
A ɲi faaben kaaran ya yi,
a da du koyi o yi.
3 O ga da ke be mugu na a wari,
o wa axa xibaarini ti a yi,
kuudo o do axa na ɲa kapanlenmo yi.
Ken ŋa,
o su do Baaba Alla do i renmen Isa Alimasiiwu na ɲa kapanlenmaaxu yi.
4 Ken ya ni,
o ga safandi katta axa yi kuudo o sewoyen na tinme.
[Xuraye]
5 O ga da xibaare be mugu Isa Alimasiiwu yi,
a faayi o gaa kiɲandini axa yi :
Alla ni fonxuran ya yi,
bite su nta a yi.
6 Selli o ga na ti :
« O do Alla na kapanlenmaaxun ya yi »,
xa o wa terene biten ŋa,
ken ŋa o da gaaren ya ko,
o nta tonŋu kanma.
7 Xa selli o gaa terene fonxuran noxon ŋa xo a yinme gaa fonxuran ŋa moxo ke be,
o kapanlenmon ya ni me yi,
a renme Isa foren xa na o senondini na o junuubun su bogu o yi.
8 Selli o ga na ti :
« Junuubuɲaŋaano feti o yi »,
o da du neene,
o nta tonŋu kanma.
9 Xa,
selli o ga na xiire ti o junuubunun ŋa,
Alla ni duntenŋen ya,
teleŋonten ya ni,
ken ya saabu da a gaa yanpana o junuubunun ŋa,
na o senondi bakka o golli burun su yi.
10 Selli o ga na ti :
« O ma junuubungolle ɲa abada »,
o da Alla ɲa gaarante yi,
a daalen nta o sondomun ŋa.