Yohanna bataaxi sikkandi
1
Ke bataaxe giri nke ya yi,
Xirise ke,
a wa katta Gaayi,
n xana liŋe ke be in ga da a xanu xanuye su xenpa.
2 N xana liŋe,
n wa Alla ɲaagana an fiinun su nan siro.
An yonkin sahanten ga ni moxo ke be,
an faten xa nan saha kundun ŋa.
3 Waaxinu yogo kiɲe in ŋa,
nan seede ti a yi an naxaanen siitinten ga do tonŋun ŋa moxo be,
do an gaa bireene tonŋun kanma moxo be.
Ken da in sewondi moxo siri.
4 Na a mugu nan ti in lemunun wa bireene tonŋun kanma,
fo wo fo ra nta in sewondini na ken baga.
5 N xana liŋe,
an ga da siroye be ɲa o maarenmun da i mukkaaxun ŋa,
ken ni liimaanagankaaxun ya yi.
6 I seede ti an xanuyen ŋa isanjaman jon ŋa.
Duruxoto an na i deema i terende ke yi xoyi a ga n liŋi Alla da moxo be.
7 Baawo Alimasiiwun gollen ya n da i girindi.
I ma duŋe sere tana su deemande yi isanjaman ga fe.
8 Ken saabu da,
o na ku me sero bisimilla,
waajibin ya ni.
Ken moxo,
o xa na kafu i ya i gaa gollini tonŋu ke be da.
9 N da digaamu yogo safa katta isanjama ke yi,
xa Jotereefu nta in ɲaamarindun jaatene.
A xa wa a mulla nan ɲa fi su yinmen ŋa.
10 Ken saabu da,
n ga na ri,
Jotereefu gaa moxo su yi,
ma in ga da a ko axa da.
A wa gaaren koono na o bonondi,
ken ma a baga,
a wa balla o waaxinun xa bisimillana.
Sero xa be gaa a mulla na i bisimilla,
a wa kun xa kabana,
na i xata bakka isanjaman ŋa.
11 N xana liŋe,
maxa bureye yaaxa,
siroyen ya yaaxa.
Sere be gaa a siren ya dabarini,
ken giri Alla ya yi.
Sere be gaa a buren ya dabarini,
ken nta Alla tu.
12 A su ni Demeteeri ken toxosiren ya koono.
Tonŋun wa warini a jikkun ŋa.
O xa wa seedene a da.
An wa a tu xa nan ti o seedaaxun ni tonŋun ya yi.
13 Fo gabe wa in maxa na a safa katta an ŋa.
Xa,
n nta a mulla na ken ɲa ti xaliibe do dawa yi.
14 A wa in kiilen ŋa,
o na me wari ku bito,
o na sefe yaaxe ti yaaxe.
15 Hari na xeeri kini an ŋa.
O xananun wa an kuuɲini.
An na o kuuɲinden kiɲandi o xananun ŋa,
baane su ti an toxon do an janmun ŋa.