1
Ke bataaxe wa gilli inke Yehuuda yi, Isa Alimasiiwu kome ga ni in ŋa, Yaaxuba waaxi ga ni in ŋa. Bataaxe ke wa katta Baaba Alla ga da ku be xiri, na i xanu, na i tanga ti Isa Alimasiiwu horoman ŋa. 2 Hinneyen do xeerin do xanuyen gan na guuji axa kanma.3 N maaren liŋu, n ɲi a mulla moxo siri nan safandi katta axa yi o kafumanton kisiyen xibaaren ya kanma, xa saasa a ɲaŋi in kanma waajibin ŋa, n nan safandi, kuudo na duuruxotoye ya kini axa yi, axa nan gaja danqanaaxun da, ke be ga kini sere sennun ŋa ta tinmanta baane, 4 baawo sero yogonu da du walaxi axa yi, kun yanganxatan safe kitaabi sennun noxon ŋa nan dalla, kun garamajigu ya na Alla neeman yillana, na a ɲa jeeniyihaqidangintaaxun ŋa, i wa Isa Alimasiiwu nakkarini, o yinmanka baanen do o kaman baane.
5 N wa a mulla na axa sinmandi do fiinu yi, hari axa gaa i tu moxosiri, kun ga ni nan ti : Kamanen da Banisirayila jaman kisi ta tinmanta baane ya yi Misira jamaanen ŋa, ken falle, ku beenu ga xandunxotaaxu, a da i halaki.* 6 Maliikannu ku xa be ga ma du toxo i taaxan ŋa, i ga da i sigiran wara,* Alla wa i abadanxarunton tigitini bitanbinnen noxon ŋa kiitikoota xooren da. 7 Sodoomu do Hamoora* do i fonkaaradundebun xa ga da du kini jeeniyen ken moxo, nan bati do luutigankaaxun ŋa, Alla da i halaki ti yinbi duumanten ya yi, ken xa ɲa gongonde yi seren su da.
8 Ken moxo baane ya ni xa, ku sero gaa i ŋanniyi burun batta, na i faton sobindi, i wa balla tunkaaxunun da, i wa kanmun tagefo darun xa xajafini. 9 Hari Minkayilu be ga ni maliikannun yinmanken ŋa, a do Ibiliisa ga da me fuutu, nan gaja do annabi Muusa furen batten ŋa, a ma wakkile Ibiliisa kiitini ti xajafinde yi.¤ Xa a ti a danŋa ya tannu : « Alla gan na an langa. » 10 Xa ku sero kundu, i na fon ya xajafini, i ga nta ke be tu. I gaa ke be faamunu xo daaba xawuyun gaa i daabantaben ŋa, i motto ti ken ya yi.
11 Bone gan na i xooro ! I sukke do Xaabila* killen ya yi. Naaburen saabu da, i da du wara do Balaamu* sankuntaaxun me yi. I halaki, baawo i muruti xo Xaaruuna* ga muruti moxo be. 12 Ku ni sero ya yi kapa axa yi, i gaa axa kafonyigandun kuttu axa noxonun ŋa ji yi. I xatana i yinmenu baane ya yi, hari yaagu nta i ya. I na xo tabullun ya, ji ga nta i ya, fanken gaa i yontono. I na xo kawulenyitte be ga nta renmunu ya, ken xurudunbagunten ya ni, a karinten ya ni bogobogo. 13 I wa i yaagudunloxaaxun dabarini xurayen ŋa xo geeji banbuusen gaa i baabon walla jinlaqen ŋa moxo be. I na xo saanu be ga da i dagakillun wara ya, abadantaaxuran gemunten gaa i kaane bitanbinni jupen noxon ŋa.
14 Hanooxi, Haadama buru ɲerunde ke,* a allanxibaarindi ku sero fin kanma nan ti : « Kamanen do i wujuunun wujuunun maliikan sennun riyinten faayi, 15 kuudo na duna su kiiti, a na seren su hayiba ti garamajigigollu be i ga da dabari i garamajigaaxun noxo. A na i hayiba xadi ti xajafindidigaamu be garamajigi yangoburugumun ga da i ko katta a yi.¤ » 16 Sero ya ni, i tegunu ya abada, i wuunu ti i ɲanmoxon ŋa ya abada, nan sukke do i yinmenu yonkiliŋun ŋa. I wa du koono ti digan xooron ŋa, na seron jakki do i nafan batten ŋa.
17 Xa axakun kuŋa in maaren liŋu, o kaman Isa Alimasiiwu faarun ga da fiinu be ko axa da nan xaso, xa sinme do kun ŋa. 18 I ɲi tini axa da : « Dunanlagaren ga na ri, soyaano wa riini, i gaa sukkene do i yinmenu yonkiliŋun ŋa garamajigaaxun noxo. » 19 Kun sero ya na taxandiyen roono jaman ŋa, dunadunkansinmeyen ya na i ya, Alla Fanka Sennen nta i ya.
20 Xa axakun kuŋa in maaren liŋu, xa da axa biremoxon taga axa danqanaaxun tuuganten gaa fo senne ke be kanma, na Alla ɲaaga ti Fanka Sennen deemanden ŋa. 21 Xanuye be gaa Alla maxa katta axa yi, xa tigiti a yi, na o kaman Isa Alimasiiwu dugu, aken be gaa bireyi duumanten kinni axa yi ti i hinneyen ŋa. 22 Sikkan gaa ku be sondomun ŋa, xa hinne i ya. 23 Xa da yogonu boosi yinben ŋa na i kisi. Xa na hinne yogonu tana xa yi, xa nan kanu nan ɲexu hari i faton ga da yiraamu be sobindi.
24 Ke be ra gaa axa tangana axa ga nta xenne, na axa ro i nooron noxon ŋa, loojuru su ga nta kiteene axa yi, axa sewonta xooro, 25 ke be ga ni o Alla baanen ŋa, o kisindaana, nooron do kallankaaxu, a do senben do kandan na a ya da ti o kaman Isa Alimasiiwu yi, gelli nan xaso, katta saasa, ma abada-abada. Anmiina.