[Duwanŋe]
1
Isa Alimasiiwu gundo faraseyen faayi :
Fiinu yogonu nan xawa riini katta kaane yi,
kun fiinu wa ke kitaabe noxon ŋa.
Alla ya n da i tuyindi Isa Alimasiiwu yi,
a na i tuyindi i xidimaanon ŋa*.
Isa da i maliikan ya xayi katta i xidimaana Yohanna yi na fiinu ku tuyindi a yi.
2 Yohanna seedeyen faayi :
« N ga da fo wo fo wari,
Alla daalen ya ni,
Isa Alimasiiwu seedeyen xa ya ni mene.
3 Wulluliŋontaaxun wa seron da,
ku beenu gaa ke kitaabe xaranŋa seron da ;
a do ku beenu gaa ku annabinyinsefo terinkana nan tigiti i ya,
baawo waxatin tinko. »
[Kuuɲindibataaxe]
4 Ke bataaxe wa gilli inke,
Yohanna,
a wa katta Haasi maran Isanjamon ɲeri yi.
Ke be gaa du yi saasa,
a wa du yi nan xaso,
a wa riini,*
a gan na neema do xeeri kini axa yi.
Ruuhunu ku be ɲeri gaa a tunkantaaxaaden jon ŋa,
i gan na neema do xeeri kini axa yi.
5a Isa Alimasiiwu,
ke be ga ni seeda duntenŋen ŋa,
a be fina ga wundi nan giri bakka furun naxan ŋa,
a ya ga ni tunkan ŋa duna tunkanun su kanma,
a gan na neema do xeeri kini axa yi.
5b-6 Senben do nooron wa Isa Alimasiiwu da ma abada,
a ken be ga da o xanu,
na o maxawasa bakka o junuubunun ŋa ti i foren joqen ŋa,
na o ɲa i tunkaaxun xidimaano yi i faaba Alla da*.
Anmiina.
7 Ayiwa !
A riyinten faayi ga tabullun kanma,
ma yaaxe su ga ri a wari,
hari ku be ga da a sufa*.
Duna seran xabiilan su wa sunoono ti a xibaaren ŋa.
Tonŋu faayi !
Anmiina.
8 Kamane Alla ti :
« Nke ya ni Alifa¤,
nke ya ni Omeega ;
nke ya ni fanan do lagare*.
» Alla ya ni ke be gaa du yi saasa,
a wa du yi nan xaso,
a wa riini,
a ya ni Senbenton Senbente.
[Seren renmen wariye]
9 Nke ni Yohanna ya yi,
axa waaxi,
ke be do axa ga kafi tooran ŋa,
do axa nan kafi Allantunkaaxun ŋa,
o su da xotan muɲi ti Isa ya yi.
N ga da Alla sefon do Isa Alimasiiwu seedeyen kiɲandi,
ken ya n da in kiɲa Patimoosi¤ dunden ŋa.
10 Kamanen kootan¤ ŋa,
Alla Fanka Sennen yanqa in ŋa,
n da xan xoore mugu in falle,
a gaa xo buutu.
11 A ti :
« An yaaxen gaa ke be yi,
a safa kitaaben noxon ŋa,
an na a xayi katta batijamon ɲeri debun ŋa,
kun ga ni :
Yefeesi,
Samuraane,
Peregeemo,
Cateera,
Saradeesi,
Filadelefi,
a do Loodikke¤. »
12 N tiirinbe na in falle faayi sefaana ke yi.
N ga tiirinbe,
ma in yaaxen ga nta kanŋen lanpanu ɲeri* yi.
13 Fo yogo wa lanpanu ku ɲeri naxan ŋa,
a ga xo haadamarenme*.
Doroko giile wa rondini a yi,
a gijinmun yetunton wa ti kanŋen duusiitaaden ŋa.
14 A yinmen do a yinten wa xurana xoyi lepa,
ma an na ti maramalle.
A yaaxon wa ɲelunqene xoyi yinbinkuma*.
15 A taanun xa wa ɲelunqene xo jaxawalle,
xo jaxawalli buudanta mininte.
A manqan xanne wa xo ji xoore direye*.
16 Saanu ɲeri wa a kitti tayen ŋa,
jaraxo sexette wa bakka a raqen ŋa,
a kaaron filli su liŋun ga ni*.
A yeeson wa ɲelunqene xo kiyen gaa kinsigan ŋa.
17 N ga da a wari,
n xenu a taanun wure xo fure*.
Xa a da i kitti tayen saxu in kanma nan ti :
« Maxa kanu !
Nke ya ni fanan do lagaren* ŋa.
18 N ya ni birante ke yi,
n ɲi in ga kara,
n faayi ga bire ma abada.
Kallen do Laahara xarinlenmen xa wa in kitten ŋa.
19 Ken ŋa,
an ga da fi be wari,
fi be gaa du yi saasa,
a do fi be gaa riini ɲa,
i safa.
20 An ga da saanu ku ɲeri be wari in kitti tayen ŋa,
ken do kanŋen lanpanu ku ɲeri,
gundon ya ni,
i wure faayi :
saanu ku ɲeri,
n batijamo ku ɲeri maliikanun ya ni ;
lanpanu ku ɲeri,
n batijamo ku ɲeri ya ni. »