[Bataaxen xayiye Yefeesi Isanjaman ŋa]
2
Ken falle,
a ti in nan safandi katta Yefeesi deben batijaman maliikan ŋa nan ti :
« Saanun ɲeri gaa sere ke be kitti tayen ŋa,
a gaa terene kanŋen lanpanu ɲeri naxa,
a jaabun faayi,
a ti :
2 N wa an gollun do an fi ɲaŋunton do an muɲiyen su xala.
An ra nta sere bure muɲini,
n wa a tu.
Ku beenu ga da du ɲa faaru,
na a ɲi faaru fe,
an da i xenpe,
an da i gaaren sigindi i ya.
3 An muɲi nan toore do in toxon batten ŋa,
ken do i fi su,
an ma lanpu.
4 Xa kurallinde yogo wa in maxa katta an ŋa,
ken ga ni xanuye be ga ɲi an maxa katta in ŋa joŋaarun ŋa,
an da a wara.
5 Sinme,
a ga duguta an ŋa moxo be !
Ke jikku faraaxu nan saage katta an fanan gollun ŋa.
Ken ga fe,
an ga nta an jikku faraaxunu,
n wa riini katta an ŋa,
na an lanpanun raga an ŋa.
6 Xa fo siri baane wa an ŋa,
ken ga ni :
an ga da Nikolagankon¤ ɲangollun xoni,
xoyi nke yinme ga da i xoni moxo be. »
7 « Taro gaa sere be yi,
Alla Fanka Sennen gaa ke be koono batijamon da,
a na ken terinka de !
Sere be ga na ɲa niyindaana,
ŋaliyitte* be gaa Arijanna noxon ŋa,
n na a kaman ku a na a yiga. »
[Samuraane Isanjaman bataaxen xayiye]
8 Safandi katta Samuraane deben batijaman maliikan ŋa nan ti :
« Ke be ga ni fanan do lagaren ŋa,
ke be ga kara,
a ga yille bireene,
a jaabun faayi,
a ti :
9 n wa an xa tooran do an misikiinaaxun xala,
xa bannan ya ni an ŋa.
Sere buru ku be gaa du walla xo Yehuudiyanu,
Yehuudiyanu fe,
Ibiliisa jaman ya ni,
i gaa sefe bure su koono an da,
n wa ken xa su xala.
10 An gaa toora be walla,
maxa kanu a yi.
Ibiliisa faayi axa yogonu ya sedde kason ŋa na axa xenpe,
axa wa bito tanmi ɲaana ken ŋa,
a gaa axa toorono.
Tigiti an saxiiraaxun ŋa ma kalle,
n na ŋaliyintooren kini an ŋa. »
11 « Taro gaa sere be yi,
Alla Fanka Sennen gaa ke be koono batijamon da,
a na ken terinka de !
Niyindaanan nta Jahannaba toora¤ walla. »
[Peregeemo bataaxen xayiye]
12 Safandi katta Peregeemo deben batijaman maliikan ŋa nan ti :
« Jaraxo sexetten* gaa ke be maxa,
a jaraxon kaaron filli su liŋun ga ni,
a jaabun faayi,
a ti :
13 N wa a tu nan ti Ibiliisa tunkantaaxaaden gaa noqu be,
an taaxunten na non ya yi.
Xa,
an tigiti in toxon ŋa,
hari Hantipaasi¤ ke be ga ni in seeda duntenŋen ŋa,
koota be i ga da a kari axa noqu,
Ibiliisa tunkantaaxaaden gaa non be yi,
ken do i fi su,
an ma in nakkari.
14 Xa,
kurallinde yogo wa in maxa katta an ŋa,
ken ga ni :
sero wa an jaman ŋa,
kun na Balaamu¤ ya killun batta.
Balaamu ken xa ya n demu feeran walla Tunka Balaaxi wure,
ti a na Banisirayilaganko janba tiye yiganden ŋa,
ke be ga xurusi munon da,
ken do jeeniye.
15 Sero xa wa an jama ke yi,
Nikolagankon ya ni.
16 An jikkunun faraaxu kuŋa.
Ken ga fe,
n wa riini,
a nta hari dallana,
na a su gaja ti jaraxo* ke be gaa bakka in raqen ŋa. »
17 « Taro gaa sere be yi,
Alla Fanka Sennen gaa ke be koono jamon da,
a na ken terinka de !
Manna¤ ke be ga muqen ŋa,
ma in ga ri a kini niyindaanan ŋa,
na gidinlen xulle xa kini a yi.
Toxo kurunba* safanten wa ken gidinlen xulle kanma,
sere su nta ken toxo tu,
ma a ga ro sere ke be yi. »
[Cateera bataaxen xayiye]
18 Safandi katta Cateera deben batijaman maliikan ŋa nan ti :
« Allanlenme ke be yaaxen gaa xo yinbinkuma,
a taanun ga xo jaxawalli mininte,
a jaabun faayi,
a ti :
19 An xa golli dabarinto,
an xanuye,
an toŋondiye,
an sigan do an muɲiye,
n wa a su xala.
N wa a tu nan ti an naxaanen siitinten ni saasa diinanta fanan ŋa.
20 Xa kurallinde yogo wa in maxa katta an ŋa,
ken ga ni :
Yaxare ke be toxon ga ni Jesabeeli¤,
a ti ike ni xayifaaren ya yi,
an xa da a wara ti i yinme yi.
A da in xidimaanon sankundi,
na i janba jeeniyen ŋa,
na i wara tiye yiganden ŋa,
ke be ga xurusi munon da.
21 N da a faayi ma a wa nimisini na i jikkun faraaxu,
xa a ma duŋe fatene i jeeniyen ŋa.
22 Ayiwa,
n wa a sedde jangirantandaagon kanma,
a na toore moxo siri,
kafiini a do fo wo fo gaa jeenini doome,
xa i ga na i jikkunun faraaxu,
ken nta i kitana.
23 N wa a xaranlenmon xa karini ti taawoonen ŋa.
Ken kuŋa,
n batijaman su na a tu nan ti inke wa seren sondomen do a sinmayen su tu*.
Sere su ga da ke be dabari,
n na an tugana ken me ya yi*.
24 Xa ke tuwaaxu ga ma ɲi axakun do Cateeranko ku be maxa,
i gaa tini ku be da “ Ibiliisa gundo xooro ”,
axa ga ma i seera hari fonne,
n na a ko axa da ti :
n nta likke tana saqa axa kanma.
25 Ganta,
ke be ga axa maxa,
axa tigiti ken ŋa siri,
ma in gan ri bire be.
26-28 Sero be gaa niyindini,
na in liŋun dabari ma fiinun lagaru,
n ga da kanda be kita in faaba yi,
n na a kini i ya duna xabiilanun su kanma :
I na i goyime ti kandan mexendokkon ŋa,
i na i juri xo doorinlalle*.
»
« N na suxubansaanen¤ kini i yi. »
29 « Taro gaa sere be yi,
Alla Fanka Sennen gaa ke be koono batijamon da,
a na ken terinka de ! »