[Saradeesi bataaxen xayiye]
3
Safandi katta Saradeesi deben batijaman maliikan ŋa nan ti :
« Alla ruuhunun ɲeri* do a saanun ɲeri gaa ke be maxa,
a jaabun faayi,
a ti :
n wa an xa gollun xala.
Seron maxa,
an ŋalinten ya ni,
xa an furen ya ni de !
2 An na an yaaxon wuɲi,
kutte be ga toxo an maxa,
a do kallen gaa me yi,
an na a xotondi.
Baawo,
n ma golli tinmante su wari an maxa in Alla jon ŋa.
3 Sinme do an ga da xaranŋe ke be mugu ma an gaa a ragana.
Tigiti i ya de !
An na an du rasaaga.
An ga ma wuyi an yaaxon ŋa,
n wa riini an ju xo fayaana.
An nta in ri biren tuunu,
n na an juunu ya.
4 Ken do i fi su,
sero wa kapa Saradeesinkon ŋa,
kun ma i rondindiyiraamun sobindi.
N do i do rondindiyiran xullun wa tereene doome,
baawo i do a nan xawa ya.
5 Niyindaanan na rondindiyiran xullun kitta ke moxo ya yi.
N nta a toxon xa buruxana bakka ŋalinton kitaaben¤ ŋa.
Ayiwa,
n wa a kaman fin koono in faaba do i maliikanun jon ŋa. »
6 « Taro gaa sere be yi,
Alla Fanka Sennen gaa ke be koono batijamon da,
a na ken terinka de ! »
[Filadelefi bataaxen xayiye]
7 Safandi katta Filadelefi deben batijaman maliikan ŋa nan ti :
« Ke be sennen ga ni,
ke be ga ni tonŋu :
Tunka Daawuda kandan xarinlenmen na a ya kitten ŋa,
a ya na a fonlaqen wuɲini,
sere su ra nta a teqe,
a ya na a teqe,
sere su ra nta a wuɲini,*
« A jaabun faayi,
a ti :
8 N wa an xa gollun xala.
N faayi ga da fonlaqen wuɲi an kaane,
sere su ra nta a teqe.
N wa tu nan ti senbe lamaane ya na an ŋa,
xa ken do i fi su,
an tigiti in sefexannun ŋa,
an ma in toxo ke xa nakkari.
9 Ibiliisa jaman da du raga Yehuudiyanu yi,
xa i wa gaarana,
Yehuudiyanu fe.
A faayi in gaa riini ke be ɲa i ya :
ma in ga ri i bifindi i taŋon kanma an wure*,
i na a tu ken ŋa,
nan ti in da an xanu.
10 An ga tigiti in sefexannun ŋa nan muɲi,
ken saabu da,
jaarabe ke be gaa riini duna su kita na tagefon su jaarabi,
ma in xa ga tigiti a yi an danŋa ken koota*.
11 Fonne sa in na ri.
Ke be ga an maxa,
tigiti a ya ti an senben su yi,
kuudo sere nan maxa an niyinditooren raga an ŋa.
12 N wa niyindaanan ɲaana gondoma yi Allanbatikan noxon ŋa,
an nta bakka ma abada.
N wa in Alla xa toxon safana do a sigen ŋa,
na in Alla deben xa toxon safa kafiini a yi,
ken ga ni Yerusalaamu Kurunba ke be gaa gilli in Alla banŋe kanmun ŋa,
kafiini in yinme toxo kurunba*. »
13 « Taro gaa sere be yi,
Alla Fanka Sennen gaa ke be koono batijamon da,
a na ken terinka de ! »
[Loodikke bataaxen xayiye]
14 Safandi katta Loodikke deben batijaman maliikan ŋa nan ti :
« Ke be toxon ga ni “ Anmiina ”,
ke be ga ni seedaana duntenŋen do tonŋunte,
ke be ga ni Alla taganden lasilin ŋa,
a jaabun faayi,
a ti :
15 N wa an xa gollun xala :
an mulle fe,
an teye fe.
Hari an mulle gan ɲi ma an teye gan ɲi sa !
16 Xa an namaninten ya ni,
an mulle fe,
an teye fe.
Ayiwa in wa an belenqunu bakka in raqen kuŋa.
17 An ti :
“ Fogumen ya na in ŋa,
naaburen wa in maxa,
n haajun ntaxa fo wo fo yi !
” An nta hari a tu nan ti an taqe bono !
An ɲaaninten ya ni,
misikiinen ya ni an ŋa,
an finkinten ya ni,
an duuron ya ni.
18 N gaa ke be koono an da :
kan yaaxadunben xobo in ŋa,
an na ɲa banna ;
yiran xullun xobo in ŋa,
an na an faten suturi,
an ntaxa hayibeene ;
yaaxanyitten xobo in ŋa,
an na fo wari siri.
19 Nke na in xanan su ya baxa-baxana,
na a haqilandi*.
Ken kuŋa,
duruxoto an na an jikkun faraaxu de !
20 Ayiwa in faayi sikki fonlaqen ŋa,
na a konko.
Sere be ga na in mugu na fonlaqen wuɲi,
n na ro katta a kaman ŋa,
o na yige doome.
21 Niyindaanan ke,
n na taaxuran ya kinni a yi in tunkantaaxaaden kanma,
xoyi nke yinme ga niyindi moxo be nan daga taaxu in faaba kaaran ŋa i tunkantaaxaaden kanma. »
22 « Taro gaa sere be yi,
Alla Fanka Sennen gaa ke be koono batijamon da,
a na ken terinka de ! »