Farasande 4

[Alla tiigande]

Ken falle, n wari xadi : n da fonlaqe yogo wuɲinten wari kanmun ŋa, xanfana be ga sefe in da, a wa xo buutu xanne nan ti : « Sege riini yere, ke be gaa riini ɲa ke su falle, n na a koyi an ŋa. » 2 Ken noqu su, yanqa in ŋa ma in yaaxen ga nta tunkantaaxaaden ŋa kanxotten ŋa. Yogo taaxunten wa a kanma. 3 Ke be ga ɲi tunkantaaxaade ke kanma, a waritiyaaxen na xo gidi faranpare ya yi, sokkinxayinman do fo dunbe. Jaagubundanŋen xa wa ɲelunqene do tunkantaaxaade ke yoorindan ŋa xo gidi sokkinxayinma. 4 Tanpille do tunkantaaxaadu naxati wa yoorini tunkantaaxaade ke yi. Tanpille do xirisu naxati taaxunten wa i kanma, yiran xullun wa rondini i ya, kanŋen tooren wa baane su yinmen ŋa. 5 Xurayen do manqanŋen do dirayen wa bakka tunkantaaxaade ke yi. Lanpa xooro ɲeri kumunton wa tunkantaaxaade ke kaane, kun ni Alla ruuhunun ɲeri ya yi. 6 Tunkantaaxaade ke kaane, geeji yogo wa ɲelunqene, an tini xo weeri. Tunkantaaxaade ke naxaanen do a yoorinda, tagefo ŋalinto naxati wa no, i xa kaane do i falle fakkan wa yaaxe yi. 7 Tagefo ŋalinta fana ke wa xo jarinte, fillanden wa xoyi gunbunlenme, sikkanden yeeson wa xoyi sere, naxatanden wa xo luuxo kanpinte. 8 Kanpo tunmi wa tagefo ŋalinto ku baananbe su yi, i wure do i kanma fakkan wa yaaxe. Wuron do kiye i nta tuumana, i wa a yi :

« Senoyen wa a da, senoyen wa a da, senoyen wa a da.

Kamane Alla, Senbenton Senbente,

ke be ga ɲi du yi nan xaso, a wa du yi saasa, a wa riini. »

9 Ke be taaxunten gaa tunkantaaxaade ke kanma, a be ŋalinten ga ni abada, tagefo ŋalinto ku ga na a suugu ti ke nooro do ke darontaaxu do ke maamande yi ta su, 10 tanpille ke do xirisun naxati xa na sujudi a da. Ke be ŋalinten ga ni ma abada, i na ken ya batta. Ken noxon ŋa, i na i toorun sedi tunkantaaxaade ke kaane nan ti :

11 « O Kama, o Alla, an ya do nooron do darontaaxun do senben nan xawa.

Baawo an ya n da fo wo fo taga,

an da a xanu i nan ɲa ya tan, i xosi tage. »