[Kitaaben kiniye Jaxanlenmen ŋa]
5
Ken falle,
ke be taaxunten gaa tunkantaaxaade ke kanma,
n yaaxen wa kitaabe yogo yi a kitti tayen ŋa,
a kanma do a noxon su safante,
a beexinten wa ti beexaadu ɲeri yi.
2 N yaaxen wa maliikan senbente xa yogo yi,
a xan xooren wa tini :
« Ko baane do ke kitaabe wuɲinden nan xawa na ku beexaadu butu bakka a yi na a wuɲi ? »
3 Xa sere su ma kite kanmun ŋa,
sere su ma kite ɲiiɲen kanma do a wure,
ke be ga n xawa kitaabe ke wuɲini na i yaaxen sedi a noxon ŋa.
4 N wu moxo siri,
baawo sere su ma kite,
sere be do kitaabe ke wuɲinden ga n xawa na i yaaxen sedi a noxon ŋa.
5 Xa,
xirisu ku du baananbe ti in da :
« Maxa wu !
Yehuuda fonlaqen jarinten* faayi ga ɲa niyindaanan ŋa,
Tunka Daawuda funtindo ke¤,
a ya n riini ke kitaabe ku beexaadu ɲeri butu,
na a wuɲi. »
6 Ken bire,
n yaaxen wa Jaxanlenme* yogo yi sikki,
xoyi i ga da ɲa sadaxa nan xaso.
Bennu ɲeri wa a yi.
Yaaxo ɲeri xa wa a yi,
kun ni Alla ruuhunun ɲeri ya yi,
a ga da i xayi katta ɲiiɲen su yi.
A wa tunkantaaxaade ke naxaanen ŋa,
tagefo ŋalinto ku naxati do xirisu ku naxan ŋa.
7 Jaxanlenme ke tere katta ke be taaxunten gaa tunkantaaxaade ke kanma,
kitaaben gaa a be maxa i kitti tayen ŋa,
na a raga a yi.
8 A ga da kitaabe ke raga tan,
tagefo ŋalinto ku naxati do tanpillen do xirisu ku naxati su sujudi Jaxanlenme ke jon ŋa.
Baane su ganbaren wa an kitten ŋa,
kanbeelon wa baane su maxa,
a fakkan wa te timiliŋe yi,
ken ni Alla sere sennun allanɲaageyun ya yi.
9 I wa a kanma na suugu kurunba yogo ko ti :
« An ya do ke kitaabe nan xawa,
an ya n xawa ku beexaadu butunu,
baawo an ya n ɲa sadaxa nan xaso,
an ya n da seron maxawasa Alla da ti an foren joqen ŋa,
bakka fonlaqun su yi,
xannun su yi,
jamaanun su yi,
a do xabiilan su yi.
10 An da i ɲa tunkaaxun xidimaano yi o Alla da*,
i na mare ɲiiɲen su kanma. »
11 Ken falle,
wariye tana ri in ŋa xadi :
n taron wa maliikan jama yogo xannen ŋa,
i wa tunkantaaxaade ke do tagefo ŋalinto ku do xirisu ku yoorini.
I jaaten wa taŋene wujunun wujunun ŋa,
i ra nta hari jaatene.
12 I xan xooren wa tini :
« Jaxanlen sadaxinte ke,
a ya do senben nan xawa,
a ya do bannaaxun nan xawa,
a ya do fontuwaaxun nan xawa.
Fanka,
daroye,
nooro,
a do tiigeyen na a ya da. »
13 Tagefo su gaa kanmun ŋa,
a gaa ɲiiɲen kanma do a wure,
ken do geeji noxo,
tagefo su gaa i ya,
n da a su mugu,
i gaa tini :
« Ke be gaa tunkantaaxaade ke kanma,
a do Jaxanlenme ke,
Tiigeyen do darontaaxun do nooron do senben wa i da ma abada. »
14 Tagefo ŋalinto ku naxati xa wa tini :
« Anmiina !
» Xirisu ku xa na sujudi na i batu.