[Beexaadun tunmi butunde]
6
Ken falle,
n wari xadi :
Jaxanlenmen da beexaadi fanan butu bakka beexaadu ku ɲeri yi,
n da tagefo ŋalinto ku fanan mugu,
a xannen gaa xo kanmen direye.
Tagefo ke ti :
« Li ! »
2 N gaa faayindini,
ma in yaaxen ga nta si xulle* yogo yi.
Ke be gaa si ke kanma,
bundanŋen wa a kitten ŋa.
I da toore yogo kini a yi.
Niyindaanan ya ni,
a daga niyindi.
3 Jaxanlenmen ga da beexaadi fillanden butu,
n da tagefo ŋalinto ku fillanden mugu tini :
« Li ! »
4 Ken noqu su,
si yogo ri,
a wa dunbunu xo yinbe.
Ke be gaa ken si kanma,
senben kini a yi,
i da kaafa xoore yogo xa kini a yi a na horoman wutu bakka ɲiiɲen kanma,
seron nan saage me karini.
5 Jaxanlenmen ga da beexaadi sikkanden butu,
n da tagefo ŋalinto ku sikkanden xa mugu tini :
« Li !
» N gaa faayindini,
n yaaxen wa si binne yogo yi.
Ke be gaa a kanma,
xensendifon wa a kitten ŋa.
6 N da xanne mugu,
an tini a bogu tagefo ŋalinto ku naxati naxan ya yi,
nan ti :
« Fuɲanŋen muudu baane jonko,
kiye golle tugaade !
Yillen muudu sikki,
kiye golle tugaade !
Xa,
xa da ten do reesenjin ken toxo i moxon ŋa. »
7 Jaxanlenmen ga da beexaadi naxatanden butu,
n da tagefo ŋalinto ku naxatanden xa mugu tini :
« Li ! »
8 N gaa faayindini,
n da si yogo wari,
a faten laxanma.
Ke be gaa a kanma,
i da a xiri « Kalle »,
Laahara wa do a batten ŋa.
I da senben kini i ya ɲiiɲen taxandi naxatanden kanma,
ti i nan karindi ti jaraxon ŋa,
i nan karindi ti dullen ŋa,
i nan karindi ti taawoonen ŋa,
i nan karindi ti gunnen fonɲaatun ŋa*.
9 Jaxanlenmen ga da beexaadi karaganden butu,
seron ga da ku be kari do Alla sefon do seedaaxun kiɲanden ŋa,
n yaaxen wa i xa yonkinun ŋa sadaxindinoqun wure.
10 I xan xooren wa tini :
« Kaman senne,
kaman tonŋunte,
an dugundini ma kan bire,
an gaa kiitini na o foren haqen bogu dunadunko yi ? »
11 Ken noqu,
i da sabidooro xulle kini baane su yi,
nan ti i nan muɲi fonne,
ma ku be ga ni i kapanlenmon do i waaxinun ŋa,
i ga n xawa kalla xoyi i moxo,
kun jaate ga na tinme.
12 Jaxanlenmen ga da beexaadi tunmunden butu,
n da ɲiiɲen wari sarallene saralleyi xote.
Kiyen fina xo yiran kiri binne.
Xason muuman dunbu xo fore*.
13 Saanun kuti gilli kanmun ŋa nan yere ɲiiɲen ŋa xo dundon ga da dinde be ren xinton yerendi*.
14 Kanmun kafi me yi xoyi an ga da yirandoora gunu,
a sanku.
Giden do dunden su giri i batten ŋa*.
15 Ɲiiɲen tunkanyugu,
a seri xooro,
kurun yinmanko,
bannanun do senbento,
ken do sere ke danben su,
kome ya ga ni,
ma hoore ya ga ni,
a su muxi gidinkapun do gidinbanbun noxon ŋa*.
16 I wa tini gidun do gidindungon da :
« Xa xenu o kanma*,
o na sanku ke be gaa tunkantaaxaade ke kanma,
o nan giri a yaaxon ŋa.
O na laato bakka Jaxanlenmen butten ŋa !
17 I butu koota xooren ya n kiɲe,
ko n katta sikki i kaane* ? »