[Alla Isanjama]
7
Ken falle,
n da maliikanu naxati wari,
i gaa sikki ɲiiɲen tattun naxati yi.
I da ɲiiɲen fankankillun naxati su raga,
kuudo fanke su n maxa wuru ɲiiɲen kanma,
a n maxa wuru geejin do yitte su kanma.
2 N da maliika tana xa wari segene gilli kinbakkan ŋa,
Alla ŋalinten maaran wa a maxa.
A xiribe maliikanu ku naxati be ga da senben kita,
i ra gaa tooran kiɲana ɲiiɲen do geejin ŋa,
nan ti :
3 « Axa maxa toora kiɲa ɲiiɲe ke do geejin do yittun ŋa fina de,
ma o ga na Alla maaran* ro a komon taŋon ŋa. »
4 Maaran ro falle Banisirayila fonlaqun su taŋon ŋa,
n da a mugu i jaaten koono,
kame do tannaxate do wujunu naxati seri maarante¤ :
5 Yehuuda fonlaqe,
wujunu tanmi do fillo seri maarante,
Rubeeni fonlaqe,
wujunu tanmi do fillo seri maarante,
Gaadi fonlaqe,
wujunu tanmi do fillo seri maarante,
6 Haseeri fonlaqe,
wujunu tanmi do fillo seri maarante,
Nafutaali fonlaqe,
wujunu tanmi do fillo seri maarante,
Manaase fonlaqe,
wujunu tanmi do fillo seri maarante,
7 Simoonu fonlaqe,
wujunu tanmi do fillo seri maarante,
Leewi fonlaqe,
wujunu tanmi do fillo seri maarante,
Yisaxaari fonlaqe,
wujunu tanmi do fillo seri maarante,
8 Jebuluunu fonlaqe,
wujunu tanmi do fillo seri maarante,
Yuusufu fonlaqe,
wujunu tanmi do fillo seri maarante,
Beniyamiina fonlaqe,
wujunu tanmi do fillo seri maarante.
[Isanjaman meɲiyen Alla jon ŋa.]
9 Ken falle,
n yaaxen wa jama xoore yi,
sere su ra ma ɲi a jaatene.
Xabiilan su,
fonlaqen su,
jamaanen su,
a do xanne ke danben su seren wa sikki tunkantaaxaaden do Jaxanlenmen jon ŋa.
Sabidooro xullen wa rondini a su yi,
tamarikingun wa i kittun ŋa.
10 I xan xooren wa tini :
« Kisiyen wa o Alla maxa,
ke be gaa tunkantaaxaaden kanma,
kisiyen wa Jaxanlenmen maxa. »
11 Maliikan su da me ɲi tunkantaaxaade ke kaaron ŋa,
kafiini xirisu ku do tagefo ŋalinto ku naxati yi,
i sujudi tunkantaaxaade ke jon ŋa na Alla batu.
12 I wa tini :
« Anmiina !
Tiigeye,
nooro,
fontuwaaxu,
maamande,
darontaaxu,
senben do fanka,
i wa o Alla da ma abada.
Anmiina ! »
13 Xirisu ku du baananbe ti in da :
« Ko ni sabidooro xullun ga rondini ku be yi,
i giri minne yi ? »
14 N ti a da :
« Kamane,
an ya na ken tu !
» A ti in da :
« I giri xota xoore ya yi.
I da i sabidooronu ku wanqi na i laabandi ti Jaxanlenme ke foren ya yi.
15 Ken ya ni i gaa Alla tunkantaaxaade ke jon ŋa,
na Alla batu Allanbatikan noxon ŋa wuron do kiye.
Ke be xa taaxunten gaa tunkantaaxaade ke kanma,
a na ri i bisimilla i tilliisen wure.
16 Dulle do daqu,
baane su ntaxa i ragana.
Kiye ntaxa i katta,
tewoye ntaxa i katta*,
17 baawo Jaxanlenme ke be taaxunten gaa tunkantaaxaade ke naxaanen ŋa,
a ya ni i nagaanan ŋa,
a wa i nagaanini katta ŋalijin* waranlaqen ŋa.
Alla wa yaaxanji su suurana bakka i yaaxon ŋa*. »