[Beexaadi ɲerunde]
8
Jaxanlenmen ga da beexaadi ɲerunde ke butu bire be,
kudeyen ɲa kanxotten ŋa tanjikke miniiti me yi.
2 N yaaxen wa maliikanu ɲeri wa sikki Alla jon ŋa.
I da buutunu ɲeri kini i ya.
3 Maliika tana ri sigi sadaxindinoqun ŋa,
kansadaxanfutaadinbeelon wa a maxa.
I da timiliŋen gaben kini a yi,
a na i sadaxi kapa Alla sere sennun allanɲaageyun ŋa kansadaxindinoqun kanma tunkantaaxaaden jon ŋa*.
4 Futaaden tiiden na bogu maliikan kitten ŋa,
a do sere sennun allanɲaageyun su na sege katta Alla yi.
5 Maliikan da futaadinbeelo ke wutu,
na a faga bakka sadaxindinoqun yinben ŋa,
na a sedi ɲiiɲen ŋa.
Ken noqu,
kanmen dire,
ken do manqanŋen do ɲelunqeye,
ɲiiɲen saralle.
[Buutunu]
6 Buutunun ɲeri gaa maliikanu ku ɲeri be maxa,
i da i moxo sirondi timinden xanne maxa.
7 Fanan ga da i buutun timi,
maramallen do yinben do foren kafumanten guuji katta ɲiiɲen ŋa*.
Ɲiiɲe ke taxandi sikkan su buyi,
gunnen yitten xa taxandi sikkan su buyi,
fo wo fo ga ni dari xaye,
a su buyi.
8 Fillanden ga da i buutun timi,
a ɲa xo yinben ga da gidi xoore yogo raga,
a wurunten ga daga kati geejin ŋa.
Geeji taxandi sikkan su ɲa fore*.
9 Yonkinte su gaa geeji noxon ŋa,
a taxandi sikkan su kara.
Jiidunfuurun xa taxandi sikkan bono.
10 Sikkanden ga da i buutun timi,
saani xoore kuti gilli kanmun ŋa,
an tini yinbinkuma,
nan yere fanŋun do jinyaaxon su taxandi sikkan kanma.
11 Saane ke toxon ya ni « Xaraxasoye ».
Jin taxandi sikka xaraxaso.
Fo wo fo ga da ken ji xaraxace mini,
a fo gabe kara.
12 Naxatanden ga da i buutun timi,
kiyen taxandi sikkan bita,
xason taxandi sikkan bita,
saanun su taxandi sikkan bita,
xurayen ntaxa kiyen ŋa,
wuron tallan bita*.
13 Na in toxo faayinden ŋa,
n da luuxo yogo kanpinten mugu kanxotten ŋa,
a xan xooren wa tini :
« Wooyi bone !
Wooyi bone !
Bone wa ɲiiɲen taaxaanon da,
maliikanu sikki be ga toxo,
i ga na i buutunun timi bire be ! »