[Buutu karaganden timinde]
9
Maliikan karaganden da i buutun timi.
N da saane yogo wari gilli kanmun ŋa nan yere ɲiiɲen ŋa.
I da Jahannaba kun jupen xarinlenmen kini a yi.
2 A ga da a wuɲi,
tiide funti bakka a yi,
an tini xo yinbi xoore tiide,
na kiyen bitandi,
na fanken bonondi.
3 Buuren gaben* bogu tiide ke noxon ŋa na ɲiiɲen kanma faga.
Senbe be ga ɲanton ŋa ɲiiɲen kanma,
i da ken me kini buure ke xa yi.
4 I da i kaba i nan maxa fo bure su ɲa ɲiiɲen kanma sokkun ŋa,
i nan maxa fo bure ɲa fo wo fo xayen ya ga ni,
i nan maxa fo bure ɲa yitte su yi.
Ganta,
Alla maaran* ga nta sere be taŋen ŋa,
i na fo buren ɲa ken baane ya yi.
5 Sero ku karinde ma daga i da,
xa i na xasu karagi toora saxu i kanma.
Ken wa genme ɲanton bununden tooxen ŋa.
6 Kun kooto,
seron wa kallen muurunu safaare,
xa i nta a kitta.
I na nate do kallen ŋa,
xa kallen na wuru i ya.
7 Buure ke tuntun wa xo siinu i ga da i moxo sirondi katta gajannoqun ŋa,
an tini xo kanŋen tooren ya na a su yinmen ŋa,
a su giyan wa xo haadamarengiya.
8 I yinten wa xo yaxaren yinte,
i kanbon wa xo jarinten kanbo.
9 A su gijinmen wa xo an ga da a gooli ti mexen ŋa.
I kanpon manqanŋen wa xo gajanwotoro gaben gaa siinun ŋa wurunu telle gajannoqun ŋa.
10 A su xoqen wa xo ɲantuxoqe,
i bunnun sexettu.
I senbe ke su na i xoqu ku ya yi.
I ra wa xasu karagi toora saqa seron kanma ti i xoqun ŋa.
11 I tunka ya ni Jahannaba kun jupen maliika ke yi.
A toxon ni :
« Abadoona » Habaraaninxannen ŋa,
do « Apoloona » Gerekinxannen ŋa,
kun wure ga ni :
« Bonondindaana ».
12 Bono fanan dangi.
Fillo tana faayi ga ri xadi.
[Buutu tunmunden timinde]
13 Maliikan tunmunden da i buutun timi.
Kansadaxindinoqu ke be gaa Alla jon ŋa,
n da sefexanne yogo mugu bakka a bennun naxati yi.
14 Buutun ga maliikan tunmunde ke be maxa,
sefexanne ke ti a da :
« Surunmun bogu maliikanu ku naxati yi Furaata fan xooren kanma. »
15 Maliikanu naxati be moxo sironton gaa ti ke siine do ke xaso do ke koota do ke waxati xanne maxa,
i da surunmun bogu i ya,
kuudo i na haadaman taxandi sikkan kari.
16 N da i jaaten mugu :
kamo filli miliwo kurunsigumun ya ni.
17 Siinun do i settaanon bange in da wuraaxun ŋa kundu ya yi :
gijintangaado be gaa rondini siinu ku do i settaanon ŋa,
a wa dunbunu xo yinbinxore,
a bulanma,
a yaaxen wa xo tinbiriti.
Siinu ku yinmun wa xo jarintayinmu,
yinben do tiiden do tinbiriti tayen wa bakka i raqun ŋa.
18 Haadaman taxandi sikkan kara ku taawoonu sikki ya yi,
kun ga ni :
yinbe,
tiide,
a do tinbiriti be gaa bakka siinun raqun ŋa,
19 baawo siinu ku senben na i raqun do i xoqun ya yi.
I xoqu ku wa xo samaqu,
yinmun gaa i ya,
i na bonen ɲaana ti kun yinmun ya yi.
20 Ken do i fi su,
seren kutte be ga toxo ku taawoonu falle,
i ma tuubi bakka i munonun do jinnanun batunden ŋa.
I yinmenu ga da kanmunonun be do xaalisixullinmunonun be dabari ti i kittun ŋa,
ken do kiren do gide,
a do solle,
i ma tuubi bakka i batunden ŋa.
Ku beenu ra ga nta hari warini,
i ra nta hari mugini,
i ra nta hari terene,
i ma tuubi bakka i batunden ŋa.
21 I ma tuubi bakka i sere kallen do i suxuɲaaxun ŋa,
i ma tuubi bakka i jeeniyen do i fayiyen ŋa.