[Maliikan do kitaabinlenme]
10
Ken falle,
n yaaxen wa maliikan senbente yogo yi gilli kanxotten ŋa,
tabulle yogo xufunten wa a yi.
Jaagubundanŋen da a yinmen yoori,
a yeeson wa ɲelunqene xo kiye,
a taanun wa xo yinbingondoma.
2 Kitaabinlenme yogo wuɲinten wa a kitten ŋa.
A ta tayen wa geeji kanma,
a ta noogen wa ɲiiɲen kanma.
3 A xiribe xiribeyi xote,
an tini jarinten ya n guurunbe.
A ga xiribe,
direxannu ɲeri mugi.
4 Direxannu ku ɲeri ga mugi,
n ɲi a mulla na i safa,
xa sefexanne yogo giri kanxotten ŋa nan ti in da :
« Direxannu ku ɲeri ga da sefe be ko,
a toxo gundon ŋa,
maxa a safa*. »
5 N ga da maliika ke be siginten wari geeji do ɲiiɲen kanma,
a da i kitti tayen wutu katta kanmun ŋa*,
6 nan kuna ti Alla ke be ŋalinten ga ni ma abada,
a be ga da kanmun taga,
na ɲiiɲen taga,
na geejin taga,
a do fo wo fo gaa i noxon ŋa,
a ti :
« Sereti su ntaxa kutiini keeta,
waxatin kiɲe.
7 Xa o ga na maliikan ɲerunde ke buutuxannen mugu koota be,
ken koota ya ni Alla gundo ke ga tinme.
A demu ken ya koono i xayifaarun da,
a komo*. »
8 N ga da xanne ke be mugu kanxotten ŋa nan xaso,
a yille tini in da :
« Daga !
Maliika ke be siginten ga geejin do ɲiiɲen kanma,
kitaaben wuɲinten gaa a kitten ŋa,
an na a raga a yi. »
9 N daga katta maliika ke yi,
nan ti a na kitaabinlenme ke kini in ŋa.
A ti in da :
« A raga,
an na a yiga.
A wa xaraxasoono an noxodufoonun danŋa de,
xa a wa liŋoono an raqen ŋa xo yaage*. »
10 N da kitaabinlenmen raga maliikan ŋa na a yiga.
N raqen ŋa,
a liŋen ya ni xo yaage.
Xa in ga da a toni,
n noxodufoonun su xaraxaso in noxon ŋa.
11 Ken falle,
i ti in da :
« An nan xawa xayifaaraaxun dabarini jamaanun gabun ya da harisa,
a do xabiilanun do xannun do tunkanun gabu. »